चिपळूण -शेतकर्‍यांची वीज जोडणीची कामे रखडली

शेतकऱ्‍यांची वीजजोडणीची कामे रखडली
आमदार निकम आक्रमक ः ऊर्जा विभागाचा आढावा
चिपळूण, ता. १७ ः कोकणातील शेतकरी, सामान्य नागरिक, उद्योगधंदे आणि वीजग्राहक यांना भेडसावत असलेल्या गंभीर समस्यांकडे राज्य सरकारचे लक्ष वेधण्यासाठी आमदार नीलेश राणे आणि आमदार शेखर निकम यांनी नुकत्याच झालेल्या ऊर्जा विभागाच्या आढावा बैठकीत ठामपणे आक्रमक भूमिका मांडली. महावितरणची यंत्रणा लॉक होत असल्याने शेतकऱ्‍यांची वीजजोडणीची कामे रखडली असल्याचे त्यांनी निदर्शनास आणून दिले.
पावसाळी अधिवेशनातील ऊर्जा विभागावर झालेल्या चर्चेनंतर मुंबईत ऊर्जा राज्यमंत्री मेघना बोर्डीकर यांच्या अध्यक्षतेखाली झालेल्या बैठकीत त्यांनी कोकणातील वीजपुरवठ्याशी संबंधित अनेक समस्या मांडल्या. या बैठकीवेळी गृहराज्यमंत्री योगेश कदम, आमदार प्रशांत ठाकूर, महेंद्र दळवी, रवी पाटील, दीपक केसरकर यांच्यासह ऊर्जा विभागाचे वरिष्ठ अधिकारी, महावितरणचे प्रकल्प संचालक आणि विविध परिमंडळांचे मुख्य अभियंते उपस्थित होते. बैठकीत आमदार नीलेश राणे आणि आमदार शेखर निकम यांनी महावितरणची यंत्रणा लॉक होत असल्याने शेतकऱ्‍यांची वीजजोडणीची कामे रखडली आहेत. पैसे भरूनही शेतकऱ्यांना त्यांची जोडणीचे कामे पूर्ण करता येत नाही आणि बिलही तयार होत नाही. त्यामुळे ठेकेदारांची देयकेही थांबली आहेत. यंत्रणा अनलॉक करून तातडीने सेवा सुरू करण्याची मागणी आमदार निकम यांनी केली याशिवाय, एनएससी योजनेतील निधीअभावी रखडलेली शंभराहून अधिक ग्राहकांची कामे तातडीने पूर्ण करण्याचे निर्देश द्यावेत, अशीही आग्रही मागणी केली.
वादळवाऱ्‍यांमुळे सौरऊर्जा प्रकल्पांचे नुकसान होत असले तरी विमा कंपन्या नुकसान भरपाई देत नाहीत. त्यामुळे सौर प्रकल्पांना विमा संरक्षणाची हमी मिळावी, अशी सूचना झाली. त्याचप्रमाणे कृषीविषयक स्मार्ट प्रकल्पासाठी ट्रान्‍स्‍फॉर्मर मंजुरी प्रक्रियेला सवलत देण्यात यावी आणि ती एका महिन्याच्या आत पूर्ण व्हावी, याची मागणी झाली. ऊर्जा विभागाच्या अधिकाऱ्‍यांनी या सर्व मुद्द्यांची नोंद घेत कार्यवाही करण्याची ग्वाही दिली. ऊर्जा राज्यमंत्री मेघना बोर्डीकर यांनी संबंधित अधिकाऱ्यांना तत्काळ अहवाल सादर करण्याचे निर्देश दिले.