क्राईम

स्कूल बसला कंटेनरची धडक
सकाळ वृत्तसेवा
चिपळूण : शाळेतील विद्यार्थ्यांची वाहतूक करणाऱ्या बसला कापसाळ येथे कंटेनरने पाठीमागून धडक दिली. या अपघातात शाळेच्या बसवरील मदतनीस जखमी झाला आहे. त्याला अधिक उपचारासाठी खासगी रुग्णालयात दाखल करण्यात आले आहे. हा अपघात १६ जुलैला सकाळी झाला.
याबाबत चिपळूण पोलिस ठाण्यातून मिळालेल्या माहितीनुसार, कोलेखाजण येथील संग्राम विजय चव्हाण (वय ४८) हे कामथे, कापसाळ भागातील विद्यार्थ्यांना बसने घेऊन जातात. १६ जुलैला ते बस घेऊन चिपळूणमधून कापसाळला गेले होते. कापसाळ येथील मोरेवाडी बसस्थानकावर त्यांच्या बसमधील मदतनीस संजय खेडेकर हे विद्यार्थ्यांना बसमध्ये घेत असताना पाठीमागून येणाऱ्या कंटेनरने बसला धडक दिली. हा कंटेनर घाटकोपर येथील नीलेश राणा हा चालक चालवत होता. या अपघातामध्ये संजय खेडेकर हे जखमी झाले आहेत. संग्राम चव्हाण यांनी या अपघातासंदर्भात चिपळूण पोलिस ठाण्यात तक्रार दिल्यानंतर नीलेश राणा याच्यावर चिपळूण पोलिस ठाण्यात गुन्हा दाखल झाला आहे.
-----------
दारूच्या नशेत
तरुणाचे गैरवर्तन
चिपळूण : दारूच्या नशेत लोकांशी गैरवर्तन करणाऱ्या एका तरुणावर चिपळूण पोलिस ठाण्यात गुन्हा दाखल झाला आहे. १६ जुलैला सायंकाळी हा प्रकार भोगाळे परिसरात घडला. नांदगाव (ता. चिपळूण) येथील राहुल भरत नेटके हा तरुण बुधवारी सायंकाळी मद्यप्राशन करून भोगाळे परिसरात आपली दुचाकी वाहतुकीला अडथळा होईल, अशा ठिकाणी थांबून उभा होता. नागरिकांनी त्याला दुचाकी बाजूला करण्यासाठी सांगितल्यानंतर त्याने नागरिकांशी हुज्जत घालायला सुरुवात केली तसेच मोठमोठ्याने बोलू लागला. नागरिकांनी या संदर्भात चिपळूण पोलिस ठाण्यात माहिती दिल्यानंतर पोलिस कर्मचारी वैदेही सकपाळ या घटनास्थळी आल्या. त्यांनीही त्या तरुणाची समज काढली; परंतु तो ऐकण्याच्या मनःस्थितीत नव्हता. त्यामुळे दारूबंदी कायद्याअंतर्गत त्याच्यावर गुन्हा दाखल करण्यात आला आहे.

विषारी द्रव्य प्यालेल्या
तरुणाचा मृत्यू
चिपळूण : विषारी द्रव्य प्यालेल्या मिरजोळी येथील ३४ वर्षाच्या तरुणाचा सातारा येथे उपचारादरम्यान मृत्यू झाला. मिरजोळी येथील दीपेश संजय कदम या तरुणाने तीन जुलैला विषारी द्रव्य पिले होते. त्याला त्रास होऊ लागल्याने प्रथम चिपळूणमधील खासगी रुग्णालयात दाखल करण्यात आले. त्यानंतर अधिक उपचारासाठी त्याला कराड येथील रुग्णालयात घालवण्यात आले. तेथून त्याला सातारा येथील जिल्हा रुग्णालयात दाखल करण्यात आले. तेथे उपचार सुरू असताना ९ जुलैला त्याचा मृत्यू झाला. या घटनेची नोंद १६ जुलैला चिपळूण पोलिसांना करण्यात आली.