सराफी दुकान फोडणाऱ्या चोरट्यांचा कसून शोध सुरू

सराफी दुकान फोडणाऱ्या
चोरट्यांचा कसून शोध सुरू
कणकवली, ता. १७ः शहरातील सना कॉम्प्लेक्‍समधील भालचंद्र ज्वेलर्स सराफी दुकान फोडणाऱ्या चोरट्यांचा पोलिस पथकांकडून कसून शोध घेतला जात आहे. सराफी दुकान फोडल्‍यानंतर हे चोरटे आशिये रोडमार्गे बिजलीनगर येथील मराठा मंडळ परिसरात आले. तेथे सराफी दुकानातील सोन्या,चांदीच्या वस्तू असलेले रिकामी बॉक्‍स टाकून तेथून अन्यत्र गेले असल्याची बाब पोलिस तपासात निष्पन्न झाली.
शहरातील सना कॉम्प्लेक्‍समधील मंगेश तळगावकर यांच्या भालचंद्र ज्वेलर्स दुकानाचे शटर तोडून १० लाख १५ हजार रुपयांचे सोन्या-चांदीचे दागिने बुधवारी पहाटे २.४० ते ३.०० या दरम्‍यान चोरीस गेले होते, तर कणकवली पोलिसांनी पहाटे सव्वातीन वाजल्‍यापासून नाकेबंदी करून संशयित चोरट्यांचा शोध सुरू ठेवला होता. मात्र, चोरटे पसार होण्यात यशस्वी ठरले.
दरम्‍यान, गेल्या दोन दिवसांच्या तपासामध्ये संशयित चोरट्यांनी भालचंद्र ज्वेलर्स दुकानामध्ये चोरी केल्‍यानंतर ते दुकानाच्या मागील बाजूच्या रस्त्याने आशिये गावात जाणाऱ्या रस्त्याच्या दिशेने गेले. तेथून बसस्थानकाच्या मागील बाजूने ते बिजलीनगर येथील मराठा मंडळ इमारतीपर्यंत आले. तेथे सराफी दुकानातून चोरलेले दागिने एकत्र करून रिकामी बॉक्‍स तेथे टाकून दिले. त्‍यानंतर संशयित चोरटे गडनदीवरील बंधारामार्गे वागदे किंवा पुन्हा कणकवलीच्या दिशेने गेले असण्याची शक्‍यता पोलिसांनी व्यक्‍त केली.