नारिंग्रेकर ट्रस्टतर्फे आठ विद्यार्थ्यांना प्रोत्साहनपर शिष्यवृत्ती

78237

आठ विद्यार्थ्यांना प्रोत्साहनपर शिष्यवृत्ती

नारिंग्रेकर ट्रस्टतर्फे गौरव; मराठी, संस्कृतमधील यशाचे कौतुक

सकाळ वृत्तसेवा
मालवण, ता. १८ : येथील नगर वाचन मंदिर आणि डॉ. नारिंग्रेकर कुटुंबीय ट्रस्टतर्फे शहरातील काही प्रमुख प्रशालांमधील दहावीमध्ये मराठी आणि निम मराठी माध्यमातून संपूर्ण तसेच संयुक्त संस्कृत विषय घेऊन अव्वल आलेल्या ४ विद्यार्थी व ४ विद्यार्थिनींना प्रोत्साहनपर शिष्यवृत्ती व सन्मानपत्र प्रदान केले. नगर वाचन मंदिराच्या सभागृहात हा कार्यक्रम झाला.
कार्यक्रमाचे अध्यक्ष प्रकाश कुशे, प्रमुख अतिथी डॉ. सुभाष दिघे, उपस्थित पालक व शिक्षकांच्या हस्ते दीपप्रज्वलन व श्री देवी सरस्वतीच्या प्रतिमेला पुष्पहार अर्पण करून या कार्यक्रमाचे उद्घाटन करण्यात आले. यावेळी डॉ. दिघे यांनी, संस्कृत भाषेचा प्रचार आपण सर्वांनी करायचा आहे. संस्कृतचे ज्ञान केवळ दहावीपुरते मर्यादित न ठेवता जेवढे ज्ञान संस्कृत भाषेत मिळेल, तेवढे ज्ञान आत्मसात करावे, असे सांगितले. प्रकाश कुशे यांनी यावेळी डॉ. विजय नारिंग्रेकर यांनी हा उपक्रम ग्रंथालयाच्या माध्यमातून सुरू केल्याबद्दल त्यांचे कौतुक केले व शिष्यवृत्ती प्राप्त विद्यार्थ्यांना शुभेच्छा दिल्या.
यावेळी आर्या राणे, श्रेयस बर्वे, निशांत धुरी या अ. शि. दे. टोपीवाला हायस्कूलच्या मुलामुलींना प्रत्येकी १० हजार रुपये व जिज्ञासा सावंत, संकेत तोतरे यांना प्रत्येकी २ हजार रुपये, आर्यन गोलतकर व जान्हवी चव्हाण या भंडारी हायस्कूलच्या मुलामुलींना प्रत्येकी ३ हजार रुपये एवढी शिष्यवृत्ती व सन्मानपत्र मान्यवरांच्या हस्ते प्रदान करण्यात आले. शिक्षिका स्नेहा बर्वे यांनी विचार मांडत संस्थेच्या उपक्रमाबद्दल गौरवोद्गार काढले. पालकांमधून अजित राणे व विद्यार्थ्यांमधून आर्यन गोलतकर यांनी मनोगते व्यक्त केली. कार्यक्रमाचे प्रास्ताविक व सूत्रसंचालन ग्रंथपाल संजय शिंदे यांनी केले. श्रेया चव्हाण यांनी आभार मानले. कार्यक्रमाच्या यशस्वीतेसाठी प्रतिभा पेडणेकर, रमाकांत जाधव यांनी मेहनत घेतली.