मोफत आरोग्य शिबिर म्हणजे सामाजिक बांधिलकी

78282

मोफत आरोग्य चिकित्सा म्हणजे सामाजिक बांधिलकी

चारुदत्त देसाई; कुडाळात बॅ. नाथ पै शिक्षण संस्थेतर्फे शिबिर

सकाळ वृत्तसेवा
कुडाळ, ता. १८ ः मोफत आरोग्य शिबिराचे आयोजन ही मोठी सामाजिक बांधिलकी आहे. बॅरिस्टर नाथ पै शिक्षण संस्था ज्यांच्या त्यागातून उभी राहिली त्यांना अशा प्रकारे मोफत आरोग्य शिबिरातून आदरांजली देण्यात आली आहे. त्यांचा गरजू लोकांनी उपयोग करून घेतला पाहिजे, असे प्रतिपादन नेरूरचे माजी सरपंच तथा देवस्थान समितीचे अध्यक्ष चारुदत्त देसाई यांनी केले.
बॅरिस्टर नाथ पै शिक्षण संस्था संचलित (कै.) यशवंतराव नाईक ग्रामीण रुग्णालय व संशोधन केंद्र नेरुर व बॅ. नाथ पै नर्सिंग महाविद्यालय व फिजिओथेरपी महाविद्यालयाच्या सहकार्याने मोफत आरोग्य चिकित्सा व उपचार शिबिर आयोजित केले होते. उद्‍घाटन प्रसंगी श्री. देसाई बोलत होते. ते पुढे म्हणाल, ‘‘नेरुर परिसरातील रुग्णांना आरोग्याची उत्तम सोय या रुग्णालय व रिसर्च सेंटरमुळे प्राप्त झाली आहे. याचा लोकांनी उपयोग करावा. श्री. गाळवणकर यांच्या पुढाकाराने बॅरिस्टर नाथ पै शिक्षण संस्थेच्या फिजिओथेरपी महाविद्यालय, नर्सिंग महाविद्यालयातर्फे असे उपक्रम राबविले जात आहेत हे कौतुकास्पद आहे. याचा जास्तीत जास्त लोकांनी उपयोग करून घ्यावा. यामुळे सर्वांना आपले निरोगी आयुष्य जगणे शक्य होईल. अशा सामाजिक उपक्रमांच्या पाठीशी उभे रहा.’’
व्यासपीठावर हृदयरोगतज्ञ डॉ. राहुल गवाणकर, संस्था चेअरमन उमेश गाळवणकर, त्यांचे आई-वडील सुंदर गाळवणकर उभयत, संस्थेच्या सीईओ अमृता गाळवणकर, नर्सिंग महाविद्यालयाच्या प्राचार्य कल्पना भंडारी, पल्लवी कामत, पांडुरंग नाईक, निवासी डॉ. सायली गावडे, फिजिओथेरपी महाविद्यालयाचे प्राचार्य डॉ. प्रत्युषरंजन बिस्वाल, डॉ. ज्योतिरंजन पलटासिंग आदी उपस्थित होते.
उमेश गाळवणकर म्हणाले, ‘‘लोकांना वेदनामुक्त करण्यासाठी या शिबिराचा उपयोग झाल्यास यासारखा आनंद नाही. परिस्थिती अभावी काहींना दुखणी घेऊन आयुष्य कुंठावे लागते. त्यांना या शिबिराच्या निमित्ताने दिलासा मिळाला तर त्यासारखे समाधान नाही. यासाठी लोकांनी या आरोग्य शिबिरात सहभागी होऊन उपयोग करून घ्यावा.’’ या शिबिराचा ८६ लोकांनी लाभ घेतला. प्रा. सुमन करांगळे-सावंत यांनी सूत्रसंचालन केले.
----
‘उपक्रमांना सर्वतोपरी मदत करू’
डॉ. राहुल गवाणकर म्हणाले, ‘‘नफ्या तोट्याचा विचार न करता लोकहितासाठी विविध रोगावर उपचार शिबिराचे बॅ. नाथ पै शिक्षण संस्थेतर्फे आयोजन करण्यात येते, ही फार मोठी गोष्ट आहे. संस्थेच्या वाटचालीस हातभार लावलेले सिद्धेश गाळवणकर यांच्या द्वितीय स्मृतिदिनानिमित्त या शिबिराचे आयोजन करून लोकांना आरोग्य विषयक सेवा पुरविल्या हे फार कौतुकास्पद आहे. अशा उपक्रमास सर्वतोपरी मदत करू.’’