गुरुपौर्णिमेनिमित्त चार तालुक्यांत सभा

गुरुपौर्णिमेनिमित्त चार तालुक्यांत सभा
रत्नागिरी ः गुरुपौर्णिमेनिमित्त दापोली, चिपळूण, रत्नागिरी आणि लांजा येथे आयोजित केलेल्या महोत्सवावेळी गुरुपौर्णिमेच्या मुख्य प्रवचनात समाजव्यवस्था उत्तम राहावी आणि प्रत्येक व्यक्तीचे आध्यात्मिक कल्याण व्हावे, यासाठी व्यक्तिगत जीवनात साधना आणि धर्माचरण करण्यासाठी प्रयत्न केले पाहिजेत, असे आवाहन करण्यात आले. या प्रसंगी आयोजित आढावा बैठकीत अनेकांनी याबद्दल अधिक माहिती जाणून घेण्याची उत्सुकता दाखवली. सनातन संस्थेतर्फे सत्संग आणि हिंदू जनजागृती समितीतर्फे धर्म शिक्षणवर्ग सुरू करण्यात येत आहेत. युवकांना ही स्वसंरक्षणासाठी प्रशिक्षण वर्ग आणि लहान मुलांवर सुसंस्कार होण्यासाठी बालसंस्कार वर्ग सुरू करण्यात येणार आहेत. या विषयी सनातन संस्थेचे महेंद्र चाळके यांनी माहिती दिली.

उत्कृष्ट गणेशोत्सव मंडळ स्पर्धेसाठी आवाहन
रत्नागिरी ः राज्य उत्कृष्ट सार्वजनिक गणेशोत्सव मंडळ स्पर्धेसाठी अर्ज सादर करण्याची अंतिम मुदत २० ऑगस्ट आहे. या स्पर्धेत अधिकाधिक नागरिकांनी सहभाग नोंदवावा, असे आवाहन सांस्कृतिक कार्यमंत्री अॅड. आशिष शेलार यांनी केले आहे. या स्पर्धेच्या अधिक माहितीसाठी सर्वांनी आपापल्या जिल्ह्याच्या जिल्हाधिकारी कार्यालयाशी संपर्क साधावा, असेही त्यांनी सांगितले. स्पर्धेतील सहभागाच्या प्रवेशिका ऑनलाइन पोर्टलद्वारेही स्वीकारण्यात येणार आहेत. २७ ऑगस्टपासून सुरू होणाऱ्या गणेशोत्सवात जिल्हाधिकारी कार्यालयांनी गठित केलेली जिल्हास्तरीय समिती या स्पर्धेत सहभागी मंडळे किंवा संस्थांच्या उत्सवस्थळाला भेट देतील आणि जिल्हास्तरीय परीक्षण पूर्ण करतील. राज्यस्तरीय प्रशिक्षणात प्रथम तीन विजेत्यांना अनुक्रमे ५ लाख, २.५ लाख आणि १ लाख रुपयांचे पारितोषिक व प्रमाणपत्र देऊन गौरवण्यात येणार आहे.

चिपळूणला सैनिकी वसतिगृहात कारगिल दिवस
रत्नागिरी ः १९९९ मध्ये कारगिल सेक्टरमध्ये झालेल्या ‘ऑपरेशन विजय’मध्ये भारतीय सैन्यांनी पाकिस्तानी सैन्याविरुद्ध मिळवलेल्या विजयानिमित्त देशातील संपूर्ण नागरिक प्रत्येक वर्षाच्या २६ जुलैला कारगिल विजय दिवस साजरा करत असतात. यंदाचा कारगिल विजय दिवस २६ जुलै रोजी सकाळी १०.३० वाजता सैनिकी मुलांचे वसतिगृह, चिपळूण येथे साजरा करण्यात येणार आहे. या समारंभामध्ये जिल्ह्यातील वीरनारी, वीरमाता, वीरपिता यांचा सन्मान करण्यात येणार आहे. तरी जिल्ह्यातील वीरनारी, वीरमाता, वीरपिता, माजी सैनिक, विधवा यांनी सैनिकी मुलांचे वसतिगृह चिपळूण येथे उपस्थित राहावे, असे आवाहन जिल्हा सैनिक कल्याण अधिकाऱ्यांनी केले आहे.