चिपळूण-ठाकरे शिवसेनेचे पालिकेला निवेदन

ठाकरे शिवसेनेचे चिपळूण पालिकेला निवेदन
शहर परिसरातील समस्या ; मुख्याधिकाऱ्यांकडून कार्यवाहीचे आश्वासन
सकाळ वृत्तसेवा
चिपळूण, ता. १९ ः उद्धव ठाकरे शिवसेनेच्या चिपळूण शहर संघटनेतर्फे शहरातील विविध प्रश्न सोडविण्यासाठी मुख्याधिकारी यांना निवेदन देण्यात आले.
या निवेदनात विविध प्रश्न मांडण्यात आले आहेत. वाशिष्ठी नदीचा जुन्या पुलाखाली मार्कंडी, काविळतळी, मतेवाडी, गांधीनगर, रावतळे, ओझरवाडी, परशुराम नगर, बाळकृष्ण नगर व राधाकृष्ण नगर या भागातील लोकांच्या साधारण हजार ते बाराशे घरगुती व सार्वजनिक गणेशमूर्तींचे विसर्जन दरवर्षी येथील घाटावर होते. पण, हा पूल जुना झाल्याने तोडण्यात आला आहे. त्यामुळे या भागातील गणेशमूर्तीच्या विसर्जनाचा प्रश्न निर्माण झाला आहे. त्यावर चिपळूण पालिकेने लवकरात लवकर पर्यायी व्यवस्था करावी जेणेकरून श्री भक्तांना त्रास होणार नाही. शहरातील मुख्य बाजारपेठ, चिंचनाका, अजिंक्य आर्केडजवळचा रस्ता, खाटीकआळी परिसर, गोवळकोट रोड, वांगडे मोहल्ला, पेठमाप, रॉयलनगर, प्रभात रोड आदी ठिकाणी मोठे खड्डे पडले आहेत. पाग बौद्धवाडी ते वीरेश्वर कॉलनीकडे जाणाऱ्या जोडरस्त्यावर केवळ चार दिवसांपूर्वी खड्डे भरण्यात आले होते, मात्र तेच खड्डे पुन्हा नव्याने पडले आहेत. यावर कायमस्वरूपी उपाययोजना करून टिकाऊ डांबरीकरण झाले पाहिजे.
शहरात भटकी कुत्री व मोकाट जनावरे यांचा खूप उच्छाद मांडला आहे. त्यामुळे वाहनचालक व पादचारी तसेच वृद्ध आणि महिला व लहान मुले यांना याचा धोका आहे. अशा भटक्या कुत्र्यांचे निर्बीजीकरण करण्यात यावे व मोकाट जनावरांच्या आसऱ्याची योग्य ती व्यवस्था करावी. चिपळूण शहरातील या नागरी समस्या मुख्याधिकारी विशाल भोसले यांनी गांभीर्याने ऐकून घेतल्या व ताबडतोब कार्यवाही करण्याचे आश्वासन दिले.