महाराष्ट्र कबड्डी संघात योगेश कुलकर्णीला संधी

N78574

महाराष्ट्र कबड्डी संघात
योगेश कुलकर्णीला संधी
तळेरे : वारगाव येथील योगेश कुलकर्णी याची पंजाब चंदिगड येथे २५ ते २९ जुलै कालावधीत होणाऱ्या ७२ व्या वरिष्ठ गट पुरुष-महिला राष्ट्रीय कबड्डी स्पर्धेसाठी महाराष्ट्र राज्य संघात निवड झाली आहे. ग्रामीण भागातील या खेळाडूने जिद्द, मेहनत आणि चिकाटीच्या जोरावर हे यश प्राप्त केले असून त्याचे सर्वस्तरातून कौतुक होत आहे. श्री काळंबादेवी कबड्डी संघातून गावाचे प्रतिनिधित्व करत जिल्ह्यातील अनेक नामांकित स्पर्धामध्ये त्याने आपल्या खेळाद्वारे ओळख निर्माण केली. यंगस्टार कणकवली संघातून खेळताना सिंधुदुर्ग, रत्नागिरी तसेच मुंबई आदी अनेक स्पर्धांमध्ये चमकदार कामगिरी केली. याच कामगिरीच्या जोरावर त्याने राज्यस्तरीय स्पर्धेत तीनवेळा सिंधुदुर्ग जिल्ह्याचे प्रतिनिधित्व केलेले आहे. योगेश दरवर्षी वारगाव, कासार्डे, खारेपाटण येथील विद्यार्थ्यांना कबड्डीचे मोफत मार्गदर्शनही करत असतो. त्याची महाराष्ट्र संघात निवड लागल्यामुळे सिंधुदुर्ग जिल्ह्यातून त्याचे अभिनंदन केले जात आहे.