क्राईम

ट्रक शेडमध्ये घुसून
चालक जखमी
रत्नागिरी ः मुंबई-गोवा माहामार्गावर निवळी-बोंबलेवाडी येथे चालकाचा ट्रकवरील ताबा सुटून ट्रक एका शेडमध्ये घुसला. या अपघातामध्ये ट्रकचालक गंभीर जखमी झाला असून, उपचारासाठी त्याला खासगी रुग्णालयात दाखल करण्यात आले आहे. सुदैवाने, शेडमध्ये कोणी नसल्याने जीवितहानी टळली. ही घटना शनिवारी (ता. १९) दुपारी निवळी-बोंबलेवाडी रस्त्यावर घडली. मुंबईच्या दिशेने भरधाव वेगाने येणारा ट्रकवरील चालकाचे नियंत्रण सुटल्याने ट्रक निवळी-बोंबलेवाडी येथील रस्त्यालगत असणाऱ्या एका शेडमध्ये घुसला. या धडकेत शेडचा बांधही फुटला. या अपघातामध्ये ट्रकचालक गंभीर जखमी झाला असून, त्याला खासगी रुग्णालयात दाखल करण्यात आले आहे. सुदैवाने, शेडमध्ये अपघाताच्यावेळी कोणीही नसल्यामुळे मोठी जीवितहानी टळली आहे; मात्र ट्रकचे मोठे नुकसान झाले. घटनेनंतर स्थानिकांनी घटनास्थळी धाव घेतली आणि मदतकार्य सुरू केले. अधिक तपास पोलिस करत आहेत.

गांजा पिणाऱ्यांवर गुन्हा
रत्नागिरी ः शहरातील प्रमोद महाजन क्रीडासंकुल भिंतीलगत एका बंद टपरीच्या आडोशाला अमली पदार्थाचे सेवन करणाऱ्या तरुणाविरुद्ध शहर पोलिस ठाण्यात गुन्हा दाखल करण्यात आला आहे. कमलेश संतोष कदम (वय ३१, रा. साईसुनंदा अपार्टमेंट, शांतीनगर, रत्नागिरी) असे संशयित गांजासदृश अमली पदार्थाचे सेवन करणाऱ्या तरुणाचे नाव आहे. ही घटना शुक्रवारी (ता. १८) दुपारी प्रमोद महाजन क्रीडासंकुलाच्या भिंतीलगत एका बंद टपरीच्या आडोशाला निदर्शनास आली. पोलिसांकडून मिळालेल्या माहितीनुसार, संशयित तरुण गांजासदृश अमली पदार्थाचे सेवन करताना आढळला. या प्रकरणी पोलिस हवालदार आशिष भालेकर यांनी शहर पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे.

विषारी पदार्थ खाल्लेल्या
वृद्धाचा मृत्यू
रत्नागिरी ः गवाणे (ता. लांजा) येथील वृद्धाने उंदीर मारण्याच्या औषधाचे कण खाल्ल्याने अस्वस्थ झाला. उपचारासाठी त्याला जिल्हा शासकीय रुग्णालयात दाखल केले होते. उपचार सुरू असताना तेथील वैद्यकीय अधिकाऱ्यांनी त्याला तपासून मृत घोषित केले. धकटू काळू कांबळे (वय ९०, रा. गवाणे, ता. लांजा) असे मृत वृद्धाचे नाव आहे. ही घटना मंगळवारी (ता. १५) ला घडली. लांजा पोलिस ठाण्यात आकस्मिक मृत्यूची नोंद करण्यात आली आहे.

बेशुद्धावस्थेतील
प्रौढाचा मृत्यू
रत्नागिरी ः ट्रकमध्ये बेशुद्धावस्थेत आढळलेल्या प्रौढाला उपचारासाठी साखरपा आरोग्यकेंद्रात दाखल केले होते. तेथील वैद्यकीय अधिकाऱ्यांनी तपासून मृत घोषित केले. देवरूख पोलिस ठाण्यात आकस्मिक मृत्यूची नोंद करण्यात आली आहे. गुरुपादप्पा सिद्धरामप्पा कल्याणशेट्टी (वय ४२, रा. एकुंडी ता. सौदली, जि. बेळगाव, राज्य कर्नाटक) असे मृत प्रौढाचे नाव आहे. ही घटना शुक्रवारी (ता. १८) घडली. पोलिसांकडून मिळालेल्या माहितीनुसार, गुरुपादप्पा कल्याणशेट्टी हे रत्नागिरी-कोल्हापूर रस्त्यावर एका टपरीजवळ (ता. संगमेश्वर) येथे ट्रकमध्ये बेशुद्धावस्थेत होते. त्यांना उपचारासाठी साखरपा आरोग्यकेंद्रात दाखल केले असता तेथील वैद्यकीय अधिकाऱ्यांनी त्यांना तपासून मृत घोषित केले.