खंडाळ्यात संरक्षण प्रकल्पाला तीव्र विरोध

-rat१९p२९.jpg-
२५N७८५९६
रत्नागिरी ः खंडाळा येथे प्रस्तावित संरक्षण विभागाच्या प्रकल्पाविरोधात स्थानिक ग्रामस्थ आणि शेतकऱ्यांनी मोर्चा काढला.
-----
खंडाळ्यात संरक्षण प्रकल्पाला विरोध
शेतकऱ्यांचा मोर्चा ; कायदेतज्ज्ञ असीम सरोदे यांची उपस्थिती
सकाळ वृत्तसेवा
रत्नागिरी, ता. १९ : तालुक्यातील खंडाळा येथे प्रस्तावित संरक्षण शस्त्र सामग्री उत्पादन प्रकल्पाविरोधात आज जोरदार एल्गार देत स्थानिक ग्रामस्थ आणि शेतकऱ्यांनी मोर्चा काढला. प्रकल्पासाठी सुरू असलेली जमीन अधिग्रहणाची सूचना रद्द करावी, या प्रमुख मागणीसाठी हा मोर्चा काढण्यात आला. त्यानंतर मोर्चाचे रूपांतर सभेमध्ये झाले.
मोर्चानंतर खंडाळा येथे एक जाहीर सभा आयोजित करण्यात आली होती, यामध्ये प्रसिद्ध सामाजिक कार्यकर्ते आणि कायदेतज्ज्ञ असीम सरोदे यांची प्रमुख उपस्थिती होती. त्यांनी उपस्थितांना मार्गदर्शन करताना या प्रकल्पाचे पर्यावरणीय आणि सामाजिक दुष्परिणाम यावर सविस्तर प्रकाश टाकला. स्थानिक शेतकऱ्यांचे म्हणणे आहे की, हा प्रकल्प प्रत्यक्षात आल्यास त्यांची शेती आणि उपजीविकेची साधने हिरावली जातील तसेच, या भागातील नाजूक पर्यावरणावर गंभीर आणि अपरिवर्तनीय परिणाम होण्याची भीतीही त्यांनी व्यक्त केली आहे. प्रकल्पाला सुरुवातीपासूनच स्थानिकांकडून तीव्र विरोध होत आहे; मात्र शनिवारच्या या भव्य मोर्चामुळे हा विरोध अधिकच तीव्र झाल्याचे स्पष्ट होत आहे. त्यामुळे प्रशासनापुढे आणि उद्योग विभागापुढे एक मोठे आव्हान आहे.

चौकट...
विदर्भ, मराठवाड्यात प्रकल्प उभारावा
कोकणात जे उत्पन्न होते ते इतर ठिकाणी होऊ शकत नाही. अशा वातावरणात इथे कारखाना का आणायचा? जो दुसरीकडे लावू शकतो. विदर्भामध्ये नापीक जमीन खूप आहे. मराठवाड्यात खडकाळ जमीन खूप आहे तिथे आत्महत्यांचे प्रमाण खूप जास्त आहे. सरकारने असा प्रकल्प तेथे उभारावा, असे अॅड. असीम सरोदे म्हणाले.