-देवरुखमध्ये १५ नोव्हेंबर रोजी चर्चासत्र

देवरुखात १५ नोव्हेंबरला चर्चासत्र
साडवली, ता. २१ : प्रा. श्री. पु. भागवत यांच्या स्मृतिप्रीत्यर्थ साहित्य-संस्कृती व्यवहार या विषयावर एकदिवसीय चर्चासत्र १५ नोव्हेंबर रोजी देवरूख येथील डी-कॅड् कॉलेजमध्ये आयोजित करण्यात आले आहे.
मुंबईच्या ‘नवअनुष्टुभ’ या वाङ्मयीन नियतकालिकाने या चर्चासत्राची प्रधान जबाबदारी स्वीकारली असून, त्यांना डी-कॅड् कॉलेज आणि आठल्ये-सप्रे-पित्रे कॉलेजचे सहकार्य मिळणार आहे. देवरूखमध्ये झालेल्या ‘नवअनुष्टुभ’ परिवाराच्या बैठकीत ''नवअनुष्टुभ''चे प्रमुख ट्रस्टी प्रा. जयप्रकाश लब्धे, साहित्य अकादमी विजेते कादंबरीकार प्रा. प्रवीण बांदेकर आणि सदस्य प्राचार्य डॉ. गोविंद काजरेकर हे ज्येष्ठ सदस्य उपस्थित होते. तसेच चिपळूणचे राजन व सुषमा इंदुलकर, डॉ. सुरेश जोशी, डॉ. वर्षा फाटक, प्रा. विक्रम परांजपे, प्रा. धनंजय दळवी व व्यवस्थापिका रूपा नलावडे यांनी चर्चेत सहभाग घेतला. या नियोजित चर्चासत्रासाठी मराठी कला आणि वाङ्मय संस्कृतीच्या अनेक अभ्यासकांना निमंत्रित करण्यात आले असून, लवकरच चर्चासत्राचा सविस्तर कार्यक्रम जाहीर करण्यात येईल. प्रा. धनंजय दळवी आणि रूपा नलावडे यांनी या बैठकीचे आयोजन केले होते.