चिपळूण- चुकीच्या उड्डाणपुलाविरोधात महायुतीचा एल्गार

चुकीच्या उड्डाणपुलाविरोधात महायुतीचा एल्गार
चिपळुणात बैठक ; कापसाळपर्यंत पुलाची मागणी
सकाळ वृत्तसेवा
चिपळूण, ता. २१ : शहरात बांधण्यात येत असलेल्या उड्डाणपुलाविरोधात महायुतीच्या पदाधिकाऱ्यांनी बैठक घेऊन नाराजी व्यक्त केली. उड्डाणपूल बहादूरशेख ते कापसाळपर्यंत व्हायला हवा, यासाठी केंद्राकडे पाठपुरावा करण्याचा निर्णय बैठकीत घेण्यात आला.
शहरातील स्वा. सावरकर सभागृहात महायुतीच्या कार्यकर्त्यांची व पदाधिकाऱ्यांची बैठक झाली. बैठकीत कार्यकर्त्यांनी महामार्गाच्या कामाबाबत नाराजी व्यक्त केली. महायुतीच्या पदाधिकाऱ्यांचे शिष्टमंडळ पालकमंत्री उदय सामंत आणि केंद्रीय मंत्री नितीन गडकरी यांना भेटण्याचे बैठकीत ठरले. सद्यःस्थितीत प्रांत कार्यालयापासून केवळ भिंतीसारखा बांधण्यात आलेला हा उड्डाणपूल शहराच्या सुरक्षिततेला आणि विकासाला गंभीर इजा पोहोचवणारा आहे, अशी भावना मिलिंद कापडी यांनी व्यक्त केली.
शिवसेनेचे माजी नगरसेवक उमेश सपकाळ म्हणाले, सध्याच्या अर्धवट आणि चुकीच्या रचनेमुळे शहराचे दोन्ही भाग विभक्त होण्याची शक्यता असून, प्रांत कार्यालयाच्या मागील डोंगररांगांमधून येणारे पाणी, नाल्यांचे प्रवाह, शासकीय कार्यालये, रुग्णालये, शाळा आणि लोकवस्ती थेट बाधित होणार आहे. याशिवाय चुकीचे सर्कल, डायव्हर्जन आणि अॅप्रोच रोडमुळे पॉवरहाऊस आणि पागनाका परिसर अपघाती मृत्यूचे केंद्रबिंदू बनत चालले आहेत. बौद्धवाडीसाठी तातडीचा अंडरपास तयार करण्याची गरज आहे. कापसाळपर्यंत पूल वाढवण्याच्या मागणीसाठी सुमारे ११० कोटींचे प्रस्तावित अंदाजपत्रक तयार करून हायवे प्रशासनाकडे सादर केल्याचे सकपाळ यांनी स्पष्ट केले. लवकरच एक शिष्टमंडळ स्थापन करून हा विषय पालकमंत्री सामंत, खासदार नीलेश राणे व केंद्रीय मंत्री गडकरी यांच्याकडे सविस्तरपणे मांडण्याचे ठरले.