सीआरझेड नोटिसांबाबत नीतेश राणेंकडे गाऱ्हाणे

78962

‘सीआरझेड’ नोटिसांबाबत
नीतेश राणेंकडे गाऱ्हाणे

मालवणचे व्यावसायिक त्रस्त

सकाळ वृत्तसेवा
मालवण, ता. २१ : प्रशासनाने किनारपट्टीवरील मत्स्य व पर्यटन व्यावसायिक, तसेच निवासी घरांना ‘सीआरझेड’ कायद्यांतर्गत नोटिसा बजावल्या आहेत. यासंदर्भात मालवणमधील नागरिकांनी पालकमंत्री नीतेश राणे यांची कणकवली येथील निवासस्थानी भेट घेतली. त्यावर किनारपट्टीवरील बांधकामाबाबत राज्य व केंद्राकडून धोरणात्मक निर्णय प्रक्रिया सुरू असून, प्रशासनाने बजावलेल्या नोटिसांबाबत किनारपट्टीवरील नागरिकांनी चिंता करू नये. लवकरच याबाबत तोडगा निघेल, अशी ग्वाही मंत्री राणे यांनी यावेळी दिली.
माजी नगरसेविका सेजल परब, श्रमिक मच्छीमार संघटनेचे सन्मेश परब यांच्यासह किनारपट्टीवरील नागरिकांनी भाजप मच्छीमार सेलचे जिल्हा संयोजक रविकिरण तोरसकर यांच्या समवेत पालकमंत्री राणे यांची भेट घेऊन चर्चा केली. किनारपट्टीवरील निवासी घरे, मत्स्यव्यवसायाशी संबंधित जागेचा वापर तसेच पर्यटन व्यवसाय, घर दुरुस्ती, बांधणी व अन्य अनुषंगिक गोष्टींसाठी होणाऱ्या त्रासाबद्दल यावेळी चर्चा झाली. या चर्चेदरम्यान मंत्री राणे यांनी हा विषय महाराष्ट्राच्या संपूर्ण किनारपट्टीचा असून याबाबत केंद्र व राज्याच्या माध्यमातून धोरणात्मक निर्णय लवकरच होणार असल्याचे सांगितले. प्रधानमंत्री आवास योजनेमध्ये या कायद्यामुळे येणाऱ्या अडथळ्यांबाबत सुद्धा मार्ग निघणार आहे, असे सांगितले. केंद्र व राज्याच्या भविष्यातील धोरणात्मक निर्णयामुळे किनारपट्टी समुदायाला मोठा दिलासा मिळणार आहे. केंद्र स्तरावर याबाबत खासदार नारायण राणे आणि राज्याकडे आपणाकडून पाठपुरावा सुरू आहे, अशी माहिती मंत्री राणे यांनी दिली. यावेळी नोटिसा बजावलेल्यांपैकी नागरिक उपस्थित होते. तसेच भाजपमध्ये नव्याने प्रवेश केलेल्या शिवसेना ठाकरे पक्षाच्या माजी नगरसेविका सेजल परब व शहर उपप्रमुख सन्मेश परब यांना भाजपमधील भावी वाटचालीसाठी पालकमंत्री राणे यांनी शुभेच्छा दिल्या. यावेळी बोनी फर्नांडिस, कुशल गिरकर, नामदेव केळुसकर, विवी फर्नांडिस, रुपेश प्रभू आदी उपस्थित होते.