वैभववाडीत रस्ता कमी, खड्डे जास्त

78966

वैभववाडीत रस्ता कमी, खड्डे जास्त

संभाजी चौकात कसरत; वाहनचालकांची होतेय दमछाक

सकाळ वृत्तसेवा
वैभववाडी, ता. २१ ः एकीकडे तळेरे-कोल्हापूर महामार्गाचे काँक्रिटीकरण सुरू असताना दुसरीकडे वैभववाडी शहरातील संभाजी चौकात खड्डेच खड्डे पडले आहेत. वळणावरील हे खड्डे चुकविताना वाहनचालकांना कसरत करावी लागत आहे. हे खड्डे बुजविणार कधी, असा प्रश्न चालकांकडून विचारला जात आहे.
तळेरे-कोल्हापूर महामार्गावरील तळेरे-गगनबावडा महामार्गाचे काँक्रिटीकरण सध्या सुरू आहे. हे काम अंतिम टप्प्यात आहे. या मार्गावरील पुलजोड रस्ते आणि इतर काही ठिकाणे वगळता हा महामार्ग आता वाहतुकीस सुसाट होणार आहे. मात्र, हा महामार्ग ज्या वैभववाडीतून आणि संभाजी चौकातून जातो, त्या ठिकाणी मात्र शेकडो खड्डे पडले आहेत. मुख्य रस्त्यावरून वैभववाडी शहरात येणाऱ्या वाहनचालकांचे येथे खड्डेच स्वागत करीत आहेत. कोल्हापूर, तळेरे, फोंडा अशा सर्व मार्गांचा हा तिठा असल्याने येथे सतत वाहनांची वर्दळ असते. अनेक खड्ड्यांमुळे तेथे वाहनांना बाजू देताना वाहनचालकांची चांगलीच दमछाक होत आहे. हे खड्डे अपघातांना निमंत्रण देत आहेत.
हे सर्व खड्डे वाभवे वैभववाडी नगरपंचायतीच्या कार्यक्षेत्रात येतात, तर उंबर्डे वैभववाडी फोंडा हा राज्यमार्ग सार्वजनिक बांधकाम विभागाच्या अखत्यारीत येतो. त्यामुळे हे खड्डे नेमके बुजविणार कोण?, असा आता निर्माण झाला आहे. सध्या शेतीची कामे सुरू असल्यामुळे बाजारपेठेत लोकांची गर्दी काहीशी कमी आहे. मात्र, पुढील आठ ते दहा दिवसांत विविध उत्सव, सणांच्या निमित्ताने गर्दी वाढणार आहे. वाहतूकदेखील वाढणार आहे. त्यामुळे हे खड्डे वाहनचालकांसाठी डोकेदुखी ठरणार आहेत.
..................
कोट
खड्डे बुजविण्यासंदर्भात आम्ही महामार्ग प्रधिकरण आणि बांधकाम विभागाशी चर्चा केली आहे. येत्या तीन-चार दिवसांत हे खड्डे बुजविण्यात येणार आहेत.
- रणजित तावडे, बांधकाम सभापती, नगरपंचायत, वाभवे वैभववाडी