देवगडमध्ये लोकशाही दिनात एकच अर्ज

swt2121.jpg
78984
देवगड ः येथे तहसीलदार रमेश पवार यांच्या उपस्थितीत लोकशाही दिन साजरा झाला.
(छायाचित्र ः संतोष कुळकर्णी)

देवगडमध्ये लोकशाही दिनात एकच अर्ज
विविध विषयांवर चर्चा ः तहसीलदारांकडून समस्या सोडविण्याची ग्वाही
सकाळ वृत्तसेवा
देवगड, ता. २१ ः तालुक्यातील सर्वसामान्य जनतेच्या तक्रारी, अडचणी, समस्या यांची सोडवणूक होण्यासाठी येथील तहसीलदार कार्यालयात आयोजित करण्यात आलेल्या तालुकास्तरीय लोकशाही दिनामध्ये एकच अर्ज होता. यावर चर्चा होऊन आवश्यक त्या सूचनांची पूर्तता करण्यात येईल, असे तहसीलदार रमेश पवार यांनी यावेळी सांगितले. यावेळी उपस्थितांमधून काही सूचना करण्यात आल्या, त्याचीही पूर्तता करण्याचे श्री. पवार यांनी आश्‍वासित केले.
नागरिकांच्या समस्यांची सोडवणूक होण्यासाठी तालुकास्तरावर दर महिन्याच्या तिसऱ्या सोमवारी लोकशाही दिन राबविण्यात येत असतो. त्याप्रमाणे तालुकास्तरावर येथील तहसीलदार कार्यालयात आज लोकशाही दिन आयोजित करण्यात आला. हा आतापर्यंतचा चौथा लोकशाही दिन होता. यामध्ये महसूल संदर्भात एक अर्ज होता. यावेळी तहसीलदार श्री. पवार यांच्यासह नायब तहसीलदार श्रीकृष्ण ठाकूर, नायब तहसीलदार संतोष खरात, पोलिस उपनिरीक्षक महेश देसाई, पंचायत समिती कृषी अधिकारी दिगंबर खराडे आदी उपस्थित होते.
महसूलसंदर्भात आलेल्या अर्जाचे वाचन करून त्याच्या पूर्ततेकडे लक्ष देऊन समस्या मार्गी लावण्यात येतील, असे श्री. पवार यांनी यावेळी सांगितले. यावेळी गिर्ये येथील सामाजिक कार्यकर्ते दिलदार चौगुले यांनी तहसीलदार कार्यालयातील मुख्य प्रवेशद्वाराजवळ पावसाचे पाणी साचून राहत असल्याने नागरिकांची गैरसोय होत असल्याकडे लक्ष वेधले.
यावेळी उपस्थितांकडून तहसीलदार कार्यालयातील स्वच्छतागृहाची स्वच्छता आवश्यक असल्याचाही मुद्दा मांडण्यात आला. तहसीलदार कार्यालयातील सोयीसुविधांबाबतही चर्चा झाली. यावेळी अजय जोशी, नारायण माने यांच्यासह नगरपंचायत, महसूल, ग्रामीण रुग्णालय तसेच अन्य विभागाचे अधिकारी तसेच प्रतिनिधी उपस्थित होते.

चौकट
लोकशाही दिनाकडे अधिकाऱ्यांची पाठ
येथील तालुकास्तरीय काही प्रमुख विभागाचे अधिकारी लोकशाही दिनाकडे फिरकत नसल्याचे चित्र होते. जनतेच्या दृष्टीने महत्त्वाचे मानले जाणाऱ्या विभागाच्या प्रतिनिधींची याकडे पाठ असते. काही विभागांचे अधिकारी किंवा त्यांचे प्रतिनिधी लोकशाही दिनात अनुपस्थित असल्याचे जाणवले. लोकशाही दिनात तालुक्यातील नागरिकांना समस्या मांडण्यास वाव असल्याने महत्त्वाच्या विभागाच्या अधिकाऱ्यांनी प्रामुख्याने उपस्थित राहणे आवश्यक असल्याचे मत तहसीलदार पवार यांनी यावेळी व्यक्त केले.