चिपळूण-पुण्यातून येणाऱ्या चाकरमान्यांना दिलासा

गणपतीसाठी पुण्यातून येणाऱ्या
चाकरमान्यांना दिलासा
मध्यरेल्वेकडून विशेष १२ गाड्यांचे नियोजन
चिपळूण, ता. २१ः गणेशोत्सव काही दिवसांवर येऊन ठेपलेला असतानाच पुण्यातील कोकणातील चाकरमानी आपल्या गावी जाण्याची तयारी करत आहेत. यावर्षी गणपतीसाठी पुण्यातून कोकणात जाणाऱ्या प्रवाशांची संख्या वाढण्याची शक्यता लक्षात घेता मध्यरेल्वेने खास गणेशोत्सव विशेष गाड्यांचे नियोजन केले आहे. त्यामुळे पुण्यातून कोकणात येणाऱ्या चाकरमान्यांना दिलासा मिळाला आहे.
पुणे ते रत्नागिरी मार्गावर एकूण १२ विशेष गाड्या धावणार असून, त्यात सामान्य आणि वातानुकूलित अशा दोन्ही प्रकारांच्या सेवा असणार आहेत. गणेशोत्सवाच्या पार्श्वभूमीवर प्रवाशांची मोठी गर्दी होण्याची शक्यता आहे. त्यामुळे प्रवाशांनी वेळेपूर्वी आरक्षण करून प्रवास सुलभ करावा, असे आवाहन रेल्वे प्रशासनाकडून करण्यात आले आहे
पुणे-रत्नागिरी साप्ताहिक विशेष गाड्या (६ सेवा) ः २३ ऑगस्ट, ३० ऑगस्ट आणि ६ सप्टेंबरला पुणे येथून मध्यरात्री १२.२५ वाजता सुटेल आणि त्याच दिवशी सकाळी ११.५० वाजता रत्नागिरी येथे पोहोचेल. रत्नागिरी ते पुणे या गाड्यात वरील तारखांना संध्याकाळी ५.५० वाजता रत्नागिरी येथून सुटेल आणि दुसऱ्या दिवशी सकाळी ५ वाजता पुण्यात पोहोचेल. यासाठी चिंचवड, तळेगाव, लोणावळा, कल्याण, पनवेल, पेण, रोहा, माणगाव, वीर, करंजडी, खेड, चिपळूण, सावर्डा, आडवली रोड आणि संगमेश्वर रोड येथे थांबे असणार आहेत.
पुणे-रत्नागिरी वातानुकूलित साप्ताहिक विशेष गाड्या (६ सेवा)ः २६ ऑगस्ट, २ सप्टेंबर आणि ९ सप्टेंबरला पुण्याहून मध्यरात्री १२.२५ वाजता सुटेल आणि त्याच दिवशी सकाळी ११.५० वाजता रत्नागिरीला पोहोचेल. रत्नागिरी ते पुणे-वातानुकूलित गाडी याच दिवशी संध्याकाळी ५.५० वाजता रत्नागिरीहून सुटेल आणि दुसऱ्या दिवशी सकाळी ५ वाजता पुण्यात पोहोचेल.
.