-कळंबस्तेतील रेल्वे फाटकातील बिघाड कायम

-rat२१p१५.jpg -
P२५N७८९१२
चिपळूण : कळंबस्ते रेल्वेफाटकावरून रेल्वे जाताना फाटक पाडून दोन्ही बाजूची वाहतूक बंद केली जाते. (मुझफ्फर खान ः सकाळ छायाचित्र सेवा)
------
कळंबस्ते रेल्वेफाटकात पुन्हा बिघाड
प्रगत तंत्रज्ञान तोकडे ; वाहतूक विस्कळीत
सकाळ वृत्तसेवा
चिपळूण, ता. २१ ः प्रगत तंत्रज्ञानात एक पाऊल पुढे असणाऱ्या कोकण रेल्वेला कळंबस्ते येथील रेल्वेफाटकातील बिघाड दुरुस्त करता येत नाही. नागरिकांकडून उड्डाणपुलाची मागणी असताना ती ही पूर्ण होत नाही. मागील सहा महिन्यात हे रेल्वेफाटक तीनवेळा तांत्रिक बिघाडामुळे बंद पडले.
कोकण रेल्वेमार्गावर चिपळूण रेल्वेस्टेशनच्या नजीक कळंबस्ते येथे रेल्वेफाटक आहे. येथे ओव्हरब्रीज बांधण्याची मागणी गेल्या अनेक वर्षांपासून सुरू आहे; मात्र या मागणीला अजूनतरी यश आलेले नाही. २२ फेब्रुवारीला घडलेल्या या प्रकारानंतर कोकण रेल्वेकडून या फाटकातील तांत्रिक बिघाडाची दुरुस्ती करण्यात आल्याचे सांगण्यात आले; मात्र अवघ्या बाराच दिवसात पुन्हा तसाच प्रकार घडला. १८ जुलैला सकाळी नऊ वाजता मालगाडी जाण्यासाठी येथील रेल्वेफाटक बंद करण्यात आले. मालगाडी गेल्यानंतर तेथील कर्मचाऱ्यांनी रेल्वेफाटक उघडण्याचा प्रयत्न केला; परंतु ते उघडलेच नाही. तेथील रेल्वे कर्मचाऱ्यांनी हाताने रेल्वेफाटक उचलण्याचा प्रयत्न केला तरीही रेल्वेफाटक उघडले नाही. अखेर वाहनचालकांनी मदत केल्यानंतर रेल्वेफाटक उघडले; मात्र या दरम्यान तब्बल अर्धा तास येथील वाहतूक विस्कळीत झाली होती. दोन्ही बाजूने वाहनांच्या रांगा लागल्या होत्या. त्यामुळे रेल्वेफाटकाच्या दुरुस्तीबाबत नागरिकांमध्ये प्रश्न उपस्थित राहिले आहेत.
-------
कोट
कळंबस्ते येथील रेल्वेफाटक उघडण्यासाठी तसेच बंद करण्यासाठी एक माणूस ठेवला आहे तो पुरेसा नाही. येथे दोन माणसांची गरज आहे. कारण, दिवसा फाटक बंद पडल्यानंतर उघडण्यासाठी नागरिक मदत करू शकतात. रात्री या मार्गावर प्रवासी नसतात. त्यामुळे एकटा कर्मचारी काही करू शकत नाही. तसेच फाटकात वारंवार बिघाड होणार नाही याची काळजी घ्यावी.
- नीलेश चव्हाण, पोसरे पंधरागाव, खेड
-----------
कोट
कळंबस्ते येथील रेल्वेफाटकात बिघाड होऊन एखादा अपघात झाल्यानंतरच रेल्वे प्रशासनाचे डोळे उघडतील, असे दिसते. खासदार सुनील तटकरे यांनी येथे उड्डाणपूल उभारण्यासाठी रेल्वेला सूचना केल्या आहेत. मी पुन्हा खासदार तटकरे यांची भेट घेऊन रेल्वेमंत्र्यांकडे पाठपुरावा करणार आहे.
- शौकत मुकादम, अध्यक्ष, कोकण रेल्वे अन्याय निवारण समिती