रेल्वे प्रवासात मोबाईलची चोरी

रेल्वे प्रवासात मोबाईलची चोरी
चिपळूण : कोकण रेल्वेने प्रवास करणाऱ्या ठाण्यातील एका प्रवाशाचा रत्नागिरी ते चिपळूणदरम्यान मोबाईल चोरीला गेला. १९ जुलैला दुपारी दोन ते सायंकाळी सहाच्यादरम्यान हा गुन्हा घडला. ठाण्यातील विशाल कांबळे (वय ३५) हे १९ जुलैला जनशताब्दी एक्स्प्रेसने रत्नागिरी ते चिपळूण प्रवास करत असताना ते आरक्षित डब्यात झोपले होते. त्यांच्या झोपेचा गैरफायदा घेत संशयित आरोपीने १६ हजार रुपये किमतीचा त्यांचा मोबाईल चोरला. कांबळे यांनी या संदर्भात ठाणे येथील पोलिस ठाण्यात तक्रार दिल्यानंतर चौकशीसाठी चिपळूण पोलिस ठाण्यात दाखल करण्यात आली आहे.

भरधाव ट्रकची विजेच्या खांबाला धडक
चिपळूण : तालुक्यात खेर्डी एमआयडीसी कराड हायवेवरील वाशिष्ठी डेअरीसमोर १९ जुलैला सायंकाळी ६.३० वाजण्याच्या सुमारास एका भरधाव ट्रकने विजेच्या खांबाला धडक दिली. या अपघातात खांबाचे आणि ट्रकचेही मोठे नुकसान झाले आहे. एमआयडीसी खेर्डी येथील वाशिष्ठी डेअरीसमोर ट्रक भरधाव वेगाने आणि बेदरकारपणे चालवत विक्रम सुनील घुले (वय २५, रा. टाकळी, ता. केज, जि. बीड) याने विजेच्या खांबाला जोरदार धडक दिली. या घटनेची तक्रार किरण विश्वनाथ गवळी (वय २७, रा. खेर्डी, एमआयडीसी कॉलनी) यांनी चिपळूण पोलिसांत दिली. त्यांच्या फिर्यादीनुसार विक्रम घुले याच्या विरोधात गुन्हा दाखल करण्यात आला आहे.