काचेच्या पुलाचे आज होणार लोकार्पण

79026

काचेच्या पुलाचे आज होणार लोकार्पण

नापणे धबधबा; पालकमंत्र्यांच्या उपस्थितीत सोहळा

सकाळ वृत्तसेवा
वैभववाडी, ता. २१ ः अल्पावधीत महाराष्ट्राच्या कानाकोपऱ्यात पोहोचलेल्या नापणे धबधब्यावरील काचेच्या पुलाचा उद्या (ता. २२) पालकमंत्री नीतेश राणे यांच्या हस्ते लोकार्पण सोहळा होणार आहे. धबधब्यावर उभारलेले हा महाराष्ट्रातील पहिला काचेचा पूल असून, या पूल उभारणीनंतर पर्यटकांची गर्दी या ठिकाणी वाढली आहे.
बारमाही ओसंडून वाहणाऱ्या नापणे धबधब्यावर सिंधुरत्न योजनेतून ९९ लाख ६३ हजार रुपये खर्चून आकर्षक असा काचेचा पूल उभारण्यात आला आहे. धबधब्यावर उभारलेला महाराष्ट्रातील हा पहिला पूल आहे. सार्वजनिक बांधकाम विभागाने एका खासगी संस्थेकडून डिझाईन घेऊन हे काम पूर्ण केले आहे. सुमारे २० मीटर लांब आणि २ मीटर रुंदीच्या या पुलाचे काम फेब्रुवारीपासून सुरू होते. नापणे येथील मुख्य धबधब्याच्या वरच्या बाजूला आणि लहान धबधब्याच्या खालच्या बाजूला हा पूल उभारला आहे. काम सुरू असतानाच या पुलाची माहिती माध्यमांद्वारे सर्वदूर पसरली आहे. त्यामुळे पर्यटकांची मोठी गर्दी गेल्या काही दिवसांपासून धबधब्यावर वाढली आहे. शेकडो पर्यटक या ठिकाणी वर्षापर्यटनासाठी येत आहेत. शनिवार, रविवारी मोठी गर्दी या ठिकाणी पाहायला मिळाली. पाच-सहा दिवसांपूर्वी पुलाची काही कामे शिल्लक असल्याने तो पर्यटकांसाठी बंद केला होता. मात्र, आता पुलाचे सर्व काम पूर्ण झाले असून पालकमंत्री राणे हे उद्या दुपारी साडेबारा वाजता या पुलाचे लोकार्पण करणार आहेत. त्यामुळे उद्यापासून हा पूल पर्यटकांसाठी खुला होणार आहे.
..................
धबधब्यावर आणखी सुविधांची आवश्यकता
नापणे हा बारमाही वाहणारा जिल्ह्यातील एकमेव धबधबा आहे. या ठिकाणी बारमाही पर्यटन बहरण्यास संधी आहे. मात्र, येथील मुख्य धबधबा पाहण्यासाठी आणखी एका पुलाची गरज आहे. याशिवाय उतरण्यासाठी पायऱ्या बांधण्याची गरज आहे. येथे येणाऱ्या पर्यटकांना विविध सोयीसुविधा उपलब्ध झाल्यास मोठ्या प्रमाणात पर्यटक येतील. त्यामुळे सुविधा निर्माण कराव्यात, अशी मागणी तालुक्यातील पर्यटनप्रेमींकडून केली जात आहे.
...................
दृष्टिक्षेपात
* काचेच्या पुलावरून एकावेळी २५ ते ३० पर्यटकांना पर्यटनाचा आनंद घेण्याची व्यवस्था
* धबधब्यावर पुणे, मुंबई, कोल्हापूर, सांगली, सातारा, गुजरातसह देशाच्या कानाकोपऱ्यातील पर्यटकांची गर्दी.