देवगड महाविद्यालयामध्ये विद्यार्थ्यांना करिअरचे ध़डे

swt2136.jpg
79084
देवगडः येथील स. ह. केळकर महाविद्यालयात करिअर संसद कार्यक्रम घेण्यात आला.

देवगड महाविद्यालयामध्ये
विद्यार्थ्यांना करिअरचे धडे
सकाळ वृत्तसेवा
देवगड, ता. २२ः येथील स. ह. केळकर महाविद्यालयात जागतिक युवा कौशल्य दिनानिमित्त करिअर संसद कार्यक्रम घेण्यात आला. या उपक्रमातून विद्यार्थ्यांमध्ये नेतृत्वगुण, सामाजिक जाणीव आणि निर्णयक्षमता विकसित करण्याचा प्रयत्न करण्यात आला. कार्यक्रमाचे आयोजन राज्याचा उच्च व तंत्र शिक्षण विभाग व राज्य माहिती तंत्रज्ञान सहाय्यता केंद्र यांच्यावतीने राबविण्यात येणाऱ्या करिअर कट्टा उपक्रमांतर्गत करण्यात आले.
या उपक्रमाचा उद्देश युवकांना करिअरच्या दृष्टीने योग्य दिशा दाखविणे तसेच सामाजिक, राजकीय प्रक्रियेची जाणीव निर्माण करणे हा होता. यावेळी शरद शेटे यांनी विद्यार्थ्यांना बदलत्या तंत्रज्ञानाच्या युगात आवश्यक असलेल्या बहुआयामी कौशल्यांबाबत मार्गदर्शन केले. केवळ शैक्षणिक गुणवत्ता नव्हे तर संवाद कौशल्य, संघनियोजन, नेतृत्वक्षमता आणि डिजिटल साक्षरता ही आजच्या तरुणांची खरी गरज आहे, असे सांगत त्यांनी तरुणांना स्वतःमध्ये आत्मविश्वास निर्माण करण्याचे आणि भविष्याचा आराखडा स्वतः आखण्याचे आवाहन केले.
कार्यक्रमाच्या अध्यक्षस्थानी प्रभारी प्राचार्य विजयकुमार कुनुरे होते. यावेळी उपप्राचार्य एल. एस. सुरवसे आणि प्रा. श्रीकांत सिरसाठे यांनीही विद्यार्थ्यांशी संवाद साधत करिअर नियोजन, समाजप्रबोधन आणि जबाबदारीची भावना याअनुषंगाने मनोगत व्यक्त केले. सूत्रसंचालन शामाली तारी यांनी, प्रास्ताविक प्रा. बाळकृष्ण तेऊरवाडकर यांनी केले. आभार नीलेश वानखडे यांनी मानले.