‘शेर्पे-नापणे धबधबा’ असे नापणे धबधब्‍याला नाव द्या

‘शेर्पे-नापणे धबधबा’ असे
नापणे धबधब्‍याला नाव द्या

ग्रामस्थांची पालकमंत्र्यांकडे मागणी

कणकवली, ता. २२ ः नापणे धबधब्याला ‘शेर्पे-नापणे धबधबा’ असे नाव द्या, अशी शेर्पे ग्रामपंचायत व ग्रामस्थांनी मागणी केली आहे. त्‍याबाबतचे निवेदन त्‍यांनी पालकमंत्री नीतेश राणे यांना दिले आहे. तसेच सकारात्मक कार्यवाही करावी, अशी विनंती करण्यात आली आहे.
निवेदनात म्हंटले आहे की, ‘शेर्पे नापणे धबधबा’ हा केवळ ‘नापणे धबधबा’ नसून पूर्वीपासून त्याला ‘शेर्पे-नापणे धबधबा’ असेच नाव आहे. हा धबधबा शेर्पे ग्रामपंचायत कार्यक्षेत्र हद्दीत आहे. धबधब्याचा मार्ग, आजूबाजूची जमीन व स्थानिक बांधकामे ही सर्व शेर्पे ग्रामपंचातीच्या हद्दीत येतात. धबधब्याकडे जाणारे रस्तेमार्ग हे देखील शेर्पे ग्रामपंचायत कार्यक्षेत्राच्या हद्दीतून जातात. धबधब्याकडे येणाऱ्या पर्यटकांना शेर्पे ग्रामपंचायत हद्दीतून ये-जा करावी लागते. तेथील सर्व कर शेर्पे ग्रामपंचायतीत भरले जातात. मात्र, शासनामार्फत अलीकडेच या धबधब्यावर काचेचा पूल उभारला असून सदर पुलास शेर्पे नापणे धबधबा असे नाव न देता केवळ ‘नापणे धबधबा’ असे नाव दिले आहे. त्यामध्ये ‘शेर्पे’चा कुठेही उल्लेख नाही. वरील सर्व बाबी विचारात घेता, हा धबधबा शेर्पे ग्रामपंचायत कार्यक्षेत्रात येतो, तरी शासनाच्या दफ्तरी सदर धबधब्याच्या नावात ‘शेर्पे धबधबा’ असा बदल करण्यासाठी आपली सकारात्मक कार्यवाही व्हावी, ही नम्र विनंती. दरम्यान, हे निवेदन राज्याचे मत्स्योद्योग मंत्री तथा सिंधुदुर्ग जिल्ह्याचे पालकमंत्री नीतेश राणे तसेच मुख्य कार्यकारी अधिकाऱ्यांना दिल्याची माहिती सरपंच स्मिता पांचाळ यांनी दिली.