कंत्राटींच्या कायम सेवेसाठी प्रयत्न

swt222.jpg
79144
वेंगुर्लेः नगरपरिषदेचा स्वच्छतेत कोकणात प्रथम क्रमांक आल्याबद्दल अधिकारी व कर्मचाऱ्यांचा सत्कार करताना बाबुराव धुरी. सोबत रुपेश राऊळ, संदेश निकम, बाळू परब व इतर.

कंत्राटींच्या कायम सेवेसाठी प्रयत्न
संदेश निकमः वेंगुर्लेत ठाकरे शिवसेनेतर्फे कर्मचाऱ्यांचा सत्कार
सकाळ वृत्तसेवा
वेंगुर्ले, ता. २२ः वेंगुर्ले नगरपरिषद स्वच्छतेत पुन्हा एकदा कोकणात अव्वल ठरली. याचे सर्व श्रेय नगरपरिषदेच्या अधिकारी व स्वच्छता कर्मचाऱ्यांचे आहे. कंत्राटी कर्मचाऱ्यांना सेवेत कायम करणे हे आमच्या संघटनेचे पाहिले कर्तव्य असेल, असे प्रतिपादन वेंगुर्लेचे माजी नगराध्यक्ष तथा शिवसेनेचे उपजिल्हाप्रमुख संदेश निकम यांनी येथे केले.
वेंगुर्ले नगरपरिषदेने शासनाच्या स्वच्छ सर्वेक्षण २०२४ अंतर्गत कोकण विभागात प्रथम, राज्यात तृतीय व देशात पंधरावा क्रमांक पटकावला. याबद्दल ठाकरे शिवसेनेतर्फे वेंगुर्ले नगरपरिषदेच्या अधिकारी व स्वछता कर्मचाऱ्यांचा शाल, श्रीफळ व भेटवस्तू देऊन सत्कार करण्यात आला. पालिकेच्या स्वामी विवेकानंद सभागृहात हा सन्मान सोहळा झाला.
अध्यक्षस्थानी उपजिल्हाप्रमुख निकम होते. व्यासपीठावर शिवसेनेचे जिल्हाप्रमुख बाबुराव धुरी, सावंतवाडी विधानसभा मतदारसंघाचे प्रमुख रुपेश राऊळ, वेंगुर्ले तालुकाप्रमुख यशवंत उर्फ बाळू परब, सावंतवाडी विधानसभा मतदारसंघ महिला संघटिका सुकन्या नरसुले, महिला संघटिका तथा माजी नगरसेविका सुमन निकम, तालुका महिला संघटिका साक्षी चमणकर, नगरपालिकेचे अधीक्षक अभिषेक पाटील, माजी अधिक्षक संगीता कुबल, उभादांडा सरपंच नीलेश चमणकर आदी उपस्थित होते. या कार्यक्रमात वेंगुर्ले पालिकेतील अधिकारी व स्वच्छता कर्मचारी असे एकूण ११८ जणांचा मान्यवरांच्या हस्ते सत्कार करण्यात आला.
रुपेश राऊळ म्हणाले, ‘‘वेंगुर्ले शहराला ऐतिहासिक परंपरा आहे. या शहराचे गतवैभव पुन्हा मिळविण्याचा अधिकारी, कर्मचारी आणि नागरिकांचा प्रयत्न कौतुकास्पद आहे. सुमारे दीडशे वर्षांची परंपरा लाभलेल्या पालिकेचा नावलौकिक सर्वांच्या सहकार्यातून निश्चितच देशभरात पोहोचेल, यात शंका नाही.’’
प्रास्ताविक तालुकाप्रमुख परब यांनी केले. शिवसेना पक्ष ८० टक्के समाजकारण व २० टक्के राजकारण या धर्तीवर कार्यरत असताना अधिकारी, कर्मचाऱ्यांचा सन्मान करणे ही आमची जबाबदारी आहे, असे ते म्हणाले. सूत्रसंचालन माजी जिल्हाप्रमुख तथा माजी नगरसेवक तुषार सापळे यांनी केले. आभार माजी नगरसेविका सुमन निकम यांनी मानले.

चौकट
कर्मचाऱ्यांना पाठबळ देऊ
स्वच्छता अभियानात काम केलेल्या सर्वांचे मी अभिनंदन करतो. केवळ सत्कारावर न थांबता कंत्राटी कर्मचाऱ्यांना न्याय देण्यासाठी शिवसेनेचे प्रयत्न राहतील. स्वच्छता कर्मचाऱ्यांना सर्व प्रकारचे पाठबळ देऊ, असे बाबुराव धुरी यांनी सांगितले.