सावर्डे-घरात कुणी नसताना बदलले जातात मीटर

संगमेश्वरात परस्पर बदलले जातात वीजमीटर
ग्राहकांचा पोलिसात तक्रारअर्ज; परवानगीशिवाय मीटर बसवू नयेत
सकाळ वृत्तसेवा
सावर्डे, ता. २२ : महावितरणचे कर्मचारी घरात कुणी नसताना अनधिकृतपणे घरगुती मीटर बदलत आहेत. याबाबत महावितरणच्या अधिकाऱ्यांना बोलावून त्यांना सक्त ताकीद देण्यात यावी. संबंधितांना योग्य ती समज देऊन गावातील कोणत्याच मीटरशी ग्रामस्थांच्या परवानगीशिवाय कोणतीही छेडछाड केली जाऊ नये, असे स्पष्ट आदेश द्यावेत अन्यथा महावितरणबाबत ग्राहकांचा रोष वाढून कायदा सुव्यवस्था बिघडू शकते, अशा आशयाची तक्रार महावितरणच्या कर्मचाऱ्यांविरूद्ध कुंभारखाणी बुद्रुक (ता. संगमेश्वर) ग्रामस्थांनी संगमेश्वर पोलिसात केली आहे.
महावितरणद्वारे गावात आणि आसपासच्या परिसरात सुरू असलेल्या स्मार्टमीटर/इलेक्ट्रिक मीटर बसवण्याबाबत ग्रामस्थांच्या मनात अनेक प्रश्न आहेत. हे मीटर ज्यांची घरे बंद आहेत, ज्यांच्या घराच्या आवाराला कुलूप आहे, ज्यांच्या घरांचे गेट बंद आहे अशाच घरातील मीटर बदलले जात आहेत. याबाबत संबंधित महावितरणकडून कोणतीही पूर्वसूचना देण्यात येत नाही. कोणताही शासकीय आदेश नाही, मीटरधारकांची कोणतीही परवानगी नाही. असे असताना घराच्या आवारात बेकायदेशीररित्या घुसून जुने मीटर काढून त्या जागी दुसरे मीटर लावले आहेत.
महावितरणचे कर्मचारी ग्राहकांना कोणतीही पूर्वसूचना किंवा लेखी आदेश न देता अगदी घरात कोणी नसतानाही जुने मीटर काढून नवीन मीटर बसवत आहेत. जेव्हा ग्राहकाला त्याचा विद्यमान मीटर सदोष वाटतो तेव्हा त्याला तो बदलण्यासाठी महावितरणाकडे अर्ज करून शुल्क भरावे लागते. त्याचप्रमाणे, महावितरणला स्वतःहून मीटर बदलायचा असेल तर ग्राहकांना शासनाच्या निर्णयाची माहिती देऊन रितसर नोटीस देणे बंधनकारक आहे. तसे न करता परस्पर मीटर बदलले जात आहेत.
जुने मीटर काढून नवीन मीटर बसवताना जुन्या मीटरमधील अंतिम रीडिंग ग्राहकाला दाखवले जात नाही. नवीन बसवलेल्या मीटरमधील शून्य रीडिंग दाखवले जात नाही. जेव्हा मीटर रीडिंग घेण्याचा प्रश्न येतो तेव्हा कर्मचारी घर बंद असल्यास, गेट बंद असल्यास किंवा कुलूप असल्यास रीडिंग घेत नाहीत आणि सरासरी बिल पाठवतात; मात्र मीटर बदलण्यासाठी ग्राहक घरी नसतानाही मीटर बदलले आहेत. या तक्रारअर्जावर सुनील सुर्वे, राजेंद्र कदम, दत्ताराम सुर्वे, सतीश सुर्वे यांच्यासह ४० ग्रामस्थांच्या सह्या आहेत.