-चिपळुणात ‘आनंदयात्री पुलं’ विशेष कार्यक्रम

चिपळुणात ‘आनंदयात्री पुलं’ कार्यक्रम
सकाळ वृत्तसेवा
चिपळूण, ता. २२ ः माणूस वाचता वाचता समजतो आणि माणूस हसता हसता शिकतो, हे पु. ल. देशपांडे यांचे विचार आजही प्रत्येक मराठी मनाच्या गाभाऱ्यात जपले जातात. अशा या बहुरंगी, बहुढंगी, बहुगुणी व्यक्तिमत्त्वाच्या स्मृतींना उजाळा देण्यासाठी अखिल भारतीय नाट्य परिषदेच्या चिपळूण शाखेच्यावतीने एक अनोखा सांस्कृतिक कार्यक्रम ‘आनंदयात्री पुलं’ सादर करण्यात येणार आहे.
हा कार्यक्रम ६ ऑगस्टला रात्री ९.३० वाजता इंदिरा गांधी सांस्कृतिक केंद्र येथे रंगणार आहे. यंदाचे वर्ष हे पु. ल. देशपांडे यांचे २५वे स्मृतिवर्ष आहे. त्या निमित्ताने त्यांचा साहित्यिक, नाट्य आणि संगीतक्षेत्रातील अमूल्य ठेवा चिपळूणमधील रसिक प्रेक्षकांसमोर नव्याने साकारला जाणार आहे. कार्यक्रमात पुलंच्या साहित्यातून, नाटकांमधून, गीतांमधून निवडक भाग स्थानिक कलाकारांच्या अभिनय, वाचन, गायन आणि नृत्य सादरीकरणांतून सादर होणार आहे. अंतू बर्वा, नारायण, वाऱ्यावरची वरातीमधील साक्ष, ती फुलराणी, तुझे आहे तुजपाशी यातील संस्मरणीय प्रसंग, नाच रे मोरा या गीतावरील नृत्य अशा विविध कला परंपरा एकत्रित अनुभवायला मिळणार आहेत. विशेष म्हणजे या कार्यक्रमात चिपळूणमधील जुने आणि नवे अशा ३०हून अधिक कलाकारांचा सहभाग आहे. व्याख्याते मंदार ओक यांच्या संकल्पनेतून साकारत असलेला हा कार्यक्रम कांता कानिटकर यांच्या दिग्दर्शनाखाली रंगणार आहे. निवेदनाची बाजू प्रकाश गांधी, सोनाली खर्चे सांभाळतील. कार्यक्रमाला उपस्थित राहावे, असे आवाहन परिषदेचे अध्यक्ष डॉ. प्रशांत पटवर्धन यांनी केले आहे.