गुहागर-गुहागर कोमसापच्या अध्यक्षपदी शाहीद खेरटकर

गुहागर कोमसाप शाखेच्या
अध्यक्षपदी शाहीद खेरटकर
गुहागर, ता. २२ः कोकण मराठी साहित्य परिषदेच्या गुहागर शाखेची नवी कार्यकारिणी जाहीर करण्यात आली. त्यामध्ये अध्यक्षपदी प्रसिद्ध साहित्यिक व लोककलावंत शाहीद खेरटकर यांची बिनविरोध निवड केली आहे.
शृंगारतळी येथील लोकनेते स्व. रामभाऊ बेंडल सभागृहात झालेल्या सर्वसाधारण सभेत ही निवड करण्यात आली. या कार्यकारिणीत उपाध्यक्ष मोहन पाटील, कार्याध्यक्ष बाळासाहेब लबडे, सचिव ईश्वरचंद्र हलगरे, कोषाध्यक्ष दिनेश खेडेकर, युवा शाखा प्रतिनिधी योगेश होळंब, सदस्यपदी रजत बेलवलकर, रामेश्वर सोळंके, विश्वास वसेकर आदींची बिनविरोध निवड करण्यात आली.
या निवडीनंतर आयोजित बैठकीत कोकण मराठी साहित्य परिषदेचे केंद्रीय सदस्य व कोकण विभाग युवाशक्ती अध्यक्ष अरूण मौर्य यांनी नव्याने निवडून आलेल्या कार्यकारिणीचे अभिनंदन केले. ही नवी कार्यकारिणी एप्रिल २०२५ ते मार्च २०२८ या कालावधीसाठी कार्यरत राहणार आहे. आगामी काळात विद्यार्थ्यांसाठी साहित्यप्रवृत्त कार्यक्रम, लोककला महोत्सव, मराठी संवर्धन उपक्रम व गावोगाव साहित्यकट्ट्यांच्या आयोजनाचे संकल्प व्यक्त करण्यात आले. तालुक्यातील साहित्यिक चळवळीला नवी दिशा देणारी ही कार्यकारिणी ठरेल, असा विश्वास साहित्यप्रेमींनी व्यक्त केला.