''दुहेरी खून'' खटल्यातील आरोपीला जामीन

‘दुहेरी खून’ खटल्यातील संशयिताला जामीन
सहा वर्षानंतर प्रयत्न; लोकअभिरक्षक कार्यालय
सकाळ वृत्तसेवा
रत्नागिरी, ता. २२ ः लांजा तालुक्यातील व्हेळ गावातील चुलते आणि चुलतीच्या खुनाच्या आरोपातील संशयित पुतण्याला उच्च न्यायालयाने सहा वर्षानंतर जामीन मंजूर केला. सहा वर्षानंतर जामिनासाठी रत्नागिरी लोकअभिरक्षक कार्यालयाने प्रयत्न केले. ही घटना ९ मार्च २०१९ला सकाळी दहा वाजता घडली होती. प्रतीक चंद्रकांत शिगम असे संशयिताचे नाव आहे.
राष्ट्रीय विधी सेवा प्राधिकरणअंतर्गत लोकअभिरक्षक (न्यायरक्षक) कार्यालय-रत्नागिरी यांच्याकडून मिळालेल्या माहितीनुसार, संशयित हा गाणी ऐकत असताना चुकून आवाज मोठा झाला. चुलते एकनाथ शिगम व चुलती वनिता शिगम या दोघांनी त्याला शिवीगाळ केली आणि त्यांच्यात भांडण सुरू झाले. यावेळी ढकलाढकली झाली. एकमेकांना दगड फेकून जखमी केले गेले. चुलते आणि चुलती हे दोघे पडून जखमी होऊन त्यांचा मृत्यू झाला. संशयिताच्या डोक्यात जखम झाली. पोलिसांनी मृत चुलते आणि चुलतीच्या मुलीच्या तक्रारीवरून संशयितांवर खूनाचा गुन्हा दाखल केला.
संशयित अटक केल्या दिवसापासून सहा वर्षे जेलमध्ये होता. तथापी, जलद सुनावणी पूर्ण झाली नाही. त्याचे वय, घटना लक्षात घेता मुंबई उच्च न्यायालयाचे न्यायमूर्ती अस्वीन डी. भोबे यांनी आरोपीचा सोमवारी (ता. ९) जामीन अर्ज मंजूर केला. या कामी मुख्य लोकअभिरक्षक अॅड. अजित वायकूळ यांनी पाठपुरावा केला. तेथील उच्च न्यायालय विधी सेवा समितीच्या बचावपक्षाचे वकील अॅड. अजित सावगावे यांनी बाजू मांडली.