संरक्षक भिंतींच्या अहवालाची प्रतीक्षा

संरक्षक भिंतींच्या
अहवालाची प्रतीक्षा
सावंतवाडी, ता. २३ ः सावंतवाडी येथील इतिहासकालीन जिल्हा कारागृह वर्ग दोनची संरक्षक भिंत कोसळली होती. त्यामुळे या कारागृहातील कैद्यांना ओरोस येथे हलविले आहे. मात्र, कारागृहाच्या सर्व भिंती कमकुवत झाल्या आहेत. त्या पार्श्वभूमीवर सावंतवाडी नगरपालिकेच्या बांधकाम विभागाने मंगळवारपासून सावंतवाडी जेलनजीक असलेले दोन मार्ग तात्पुरते बंदच्या सूचना केल्या आहेत. तसे फलकही रस्त्यावर लावले आहेत. डॉ. बाबासाहेब आंबेडकर समाज मंदिरच्या बाजूने असलेला मार्ग तसेच चराठा खासकिलवाडा ये-जा करणाऱ्या मार्गावरही फलक लावण्यात आला आहे. त्यामुळे दोन रस्ते सध्या वाहतुकीस बंद करण्यात आले आहेत. इतिहासकालीन असलेल्या या जेलच्या इमारतीच्या इतर तिन्ही बाजूच्या संरक्षक भिंती धोकादायक आहेत की नाहीत, याचा अहवाल मिळणार असून, त्याची प्रतीक्षा सार्वजनिक बांधकाम विभागाला लागून राहिली आहे.
---
कुंभारमाठ येथे
भजन महोत्सव
मालवण, ता. २३ ः श्री देव स्वयंभू उत्सव मंडळातर्फे श्रावणी सोमवारनिमित्त देव स्वयंभू मंदिर, कुंभारमाठ येथे ‘भजन महोत्सव २०२५’ चे आयोजन केले आहे. यात पाच भजने सादर होणार आहेत. यात २८ जुलैला सायंकाळी ७.३० वाजता ब्राह्मणदेव प्रासादिक भजन मंडळ, आनंदव्हाळ (बुवा-प्रदीप सामंत), ४ ऑगस्टला रात्री ८ वाजता देव महापुरुष मंडळ, माड्याचीवाडी मधलीवाडी (बुवा-ऋषी गावडे), ११ ऑगस्टला सायंकाळी ७ वाजता वावडीदेवी मंडळ, सावंतवाडी, आनंदव्हाळ (बुवा-शरद सावंत), रात्री ८ वाजता विठ्ठल-रखुमाई वारकरी महिला दिंडी मंडळ खैदा कातवड, १८ ऑगस्टला रात्री ८ वाजता बाळ गोपाळ दिंडी मंडळ, आचरा ही भजने या महोत्सवात सादर होणार आहेत. या महोत्सवाचा लाभ घ्यावा, असे आवाहन देव स्वयंभू उत्सव मंडळाने केले आहे.