भजन कलेला राजाश्रय मिळवून देऊ

79384

भजन कलेला राजाश्रय मिळवून देऊ

पालकमंत्री नीतेश राणे; कुडाळ येथे जिल्हास्तरीय स्पर्धेला प्रतिसाद

सकाळ वृत्तसेवा
कुडाळ, ता. २३ ः मुख्यमंत्री देवेंद्र फडणवीस हे प्रखर हिंदुत्ववादी आहेत. त्यांच्या वाढदिवसाचे औचित्य साधून भजनी कलाकार संस्थेच्यावतीने आयोजित केलेली भजन स्पर्धा अभिमानास्पद आहे. भजनी बुवांना राजाश्रय देण्यासाठी आम्ही प्रयत्न करणार आहोत, असे प्रतिपादन मत्स्य व बंदरे विकास मंत्री तथा पालकमंत्री नीतेश राणे यांनी केले. सिंधुदुर्गात लवकरच भजन सदन उभारून पुढच्या वर्षाची स्पर्धा त्या भवनात घेण्यात येईल, असेही त्यांनी आश्वासित केले.

सिंधुदुर्ग जिल्हा भाजप आणि भजनी कलाकार संस्थेच्यावतीने कुडाळ येथे मुख्यमंत्री फडणवीस यांच्या वाढदिवसानिमित्त जिल्हास्तरीय भजन स्पर्धेचे आयोजन येथील महालक्ष्मी हॉल येथे करण्यात आले. स्पर्धेचे उद्‍घाटन पालकमंत्री राणे यांच्या हस्ते झाले. यावेळी जिल्हाध्यक्ष प्रभाकर सावंत, माजी जिल्हा परिषद अध्यक्ष रणजित देसाई, भजनी कलाकार संस्थेचे जिल्हाध्यक्ष बुवा संतोष कानडे, सुरेश सावंत, कुडाळ तालुकाध्यक्ष संजय वेंगुर्लेकर, ज्येष्ठ भजनी बुवा श्री. परब, मोहन सावंत, ज्येष्ठ भजनी बुवा श्री. पारकर आदी उपस्थित होते. यावेळी फडणवीस यांचा केक कापून वाढदिवस साजरा करण्यात आला. या कार्यक्रमाचे सूत्रसंचालन प्रा. वैभव खानोलकर यांनी केले. आभार तालुकाध्यक्ष संजय वेंगुर्लेकर यांनी मानले.
---
भजन संस्कृतीमुळे हिंदुत्ववाद टिकून!
श्री. राणे म्हणाले, ‘‘भजन संस्कृतीमुळे अजूनही हिंदुत्ववाद टिकून आहे. भजन संस्कृतीला राजयोग मिळवण्यासाठी आम्ही प्रयत्नशील आहोत. सांस्कृतिक मंत्री आशिष शेलार हे या जिल्ह्यातील आहेत. त्यामुळे त्यांना भजन संस्कृतीबद्दल माहिती आहे. लवकरच भजनी बुवांना राजाश्रय देण्यासाठी प्रयत्न करणार आहोत. भजनाच्या माध्यमातून आपल्या देवदेवतांच्या महतीचा प्रचार आणि प्रसार होत असतो. त्यामुळे भजन संस्कृतीही तेवढीच महत्त्वाची आहे. त्यामुळे येत्या काळामध्ये सिंधुदुर्ग जिल्ह्यात भजन सदन उभारण्यात येईल आणि पुढच्या वर्षीची स्पर्धाही त्या सदनामध्ये घेण्यात येईल.’’