शैक्षणिक क्षेत्रातूनही देशसेवा शक्य

79411

शैक्षणिक क्षेत्रातूनही देशसेवा शक्य

सुभेदार मेजर संजय सावंत; सावंतवाडीत भोसले नॉलेज सिटीतर्फे सन्मान

सकाळ वृत्तसेवा
सावंतवाडी, ता. २३ ः देशसेवा ही सीमारेषेपुरती मर्यादित नाही, तर शिक्षणातूनही ती शक्य आहे. त्यामुळे शिक्षणावर भर देतानाच ज्या क्षेत्रात काम कराल, तिथे सर्वोत्तम कामगिरी करून देशसेवा करा, असे आवाहन भारतीय सैन्यातील सुभेदार मेजर संजय सावंत यांनी भोसले नॉलेज सिटीच्या विद्यार्थ्यांना करत त्यांच्या मनावर देशप्रेमाचे बीज रोवले.
‘ऑपरेशन सिंदूर’मध्ये वीर नेतृत्व करणाऱ्या तालुक्यातील कारिवडे गावचे सुपुत्र सुभेदार मेजर संजय सावंत यांचा सन्मान भोसले नॉलेज सिटीच्या माध्यमातून संस्थापक अध्यक्ष अच्युत सावंत-भोसले यांनी केला. यावेळी उपस्थित विद्यार्थ्यांना संबोधित करताना ते बोलत होते.
सुभेदार मेजर सावंत यांनी ‘ऑपरेशन सिंदूर’ या अत्यंत संवेदनशील लष्करी मोहिमेत सहभागी होत सुमारे साडेआठशे जवानांचे नेतृत्व करणाऱ्या या वीर अधिकाऱ्याने आपल्या अनुभवातून विद्यार्थ्यांना देशभक्तीची प्रेरणा दिली. मेजर सावंत यांनी आपल्या भाषणात ‘ऑपरेशन सिंदूर’ची माहिती देताना लष्करी जीवनातील शिस्त, समर्पण आणि देशसेवेची मूल्ये प्रभावीपणे मांडली.
गावकुसाबाहेर पडून देशाच्या संरक्षणासाठी लढणाऱ्या मेजर सावंत यांचा जन्म कारिवडे गावात झाला. त्यांनी आपल्या लष्करी प्रवासातील संघर्ष आणि यशाची प्रेरणादायी कहाणी सांगताना उपस्थितांचे मन जिंकले. कार्यक्रमात भोसले नॉलेज सिटीचे कार्याध्यक्ष सावंत भोसले यांच्या हस्ते शाल, श्रीफळ व सन्मानचिन्ह देऊन मेजर सावंत यांचा गौरव करण्यात आला.
मेजर सावंत म्हणाले, ‘‘देशसेवा ही केवळ सीमारेषेवर नव्हे, तर शिक्षण क्षेत्रातूनही करता येते. चराठेसारख्या ग्रामीण भागात विद्यार्थ्यांना चांगले अभ्यासक्रम उपलब्ध करून देणे, ही ‘बीकेसी’ची एक देशसेवाच आहे.’’ यावेळी ‘भारत माता की जय’, ‘जय भवानी जय शिवाजी’ या घोषणांनी सभागृहातील वातावरण भारावून गेले. प्राचार्य डॉ. रमण बाणे, उपप्राचार्य गजानन भोसले, सर्व विभाग प्रमुख व विद्यार्थी मोठ्या संख्येने उपस्थित होते. एक प्रेरणादायी, ऊर्जादायी आणि देशप्रेम जागवणारा हा कार्यक्रम विद्यार्थ्यांच्या मनात नवी उमेद आणि ध्येय निर्माण करणारा ठरला. अमर प्रभू यांनी सूत्रसंचालन केले.