‘सीआरझेड नोटिसधारकांनी भाजपशी संपर्क साधावा’

‘सीआरझेड नोटिसधारकांनी
भाजपशी संपर्क साधावा’

सकाळ वृत्तसेवा
मालवण, ता. २३ ः किनारपट्टी भागातील ज्या निवासी घरे, मत्स्य व पर्यटन व्यावसायिकांना प्रशासनाकडून सीआरझेड कायदा उल्लंघनाच्या नोटिसा आल्या आहेत त्यांनी संबंधित कागदपत्रांसह फोवकांडा पिंपळ येथील भाजप तालुका कार्यालयात संपर्क साधावा, असे आवाहन भाजप मच्छीमार सेलचे जिल्हा संयोजक रविकिरण तोरसकर यांनी केले आहे.
किनारपट्टीवरील निवासी घरे, मत्स्य व पर्यटन व्यवसायिक यांना प्रशासनाकडून सीआरझेड कायदा उल्लंघनाच्या नोटिसा आल्या आहेत. या विषयात पालकमंत्री नीतेश राणे यांचे लक्ष वेधले आहे. संबंधित विषयात राज्य व केंद्र शासनाचे धोरणात्मक बदल प्रक्रिया सुरू आहे. प्रशासनाने नोटीसा बजावलेल्या व्यक्तींना १५ ऑगस्ट २०२५ पर्यंत आपले म्हणणे सादर करण्यास सांगितले आहे. अन्यथा कारवाई होणार असल्याचे नोटीसीमध्ये नमूद आहे. या विषयात प्रशासनाकडे संबंधितांची एकत्रित कायदेशीर बाजू मांडण्याच्या दृष्टिकोनातून भाजप मच्छीमार सेलने पुढाकार घेतला आहे. तरी प्रशासनाच्या नोटीसा आलेल्या व्यक्तींनी संबंधित कागदपत्रांसह भाजप तालुका कार्यालय येथे संपर्क साधण्याचे आवाहन श्री. तोरसकर यांनी केले आहे.