रेल्वेस्थानकांतील गैरसोयी दूर करा

79483
79482

रेल्वेस्थानकांतील गैरसोयी दूर करा

जिल्हाधिकारी अनिल पाटील; वरिष्ठ अधिकाऱ्यांच्या बैठकीत सूचना

सकाळ वृत्तसेवा
सिंधुदुर्गनगरी, ता. २३ ः जिल्ह्यातील सर्व रेल्वे स्थानकांवर अनेक समस्या आहेत. आवश्यक सुविधांबाबत लक्ष वेधूनही रेल्वे प्रशासनाकडून दुर्लक्ष होत आहे. याबाबत जिल्हाधिकारी अनिल पाटील यांनी जिल्ह्यात सुविधा देताना सापत्नभावाची वागणूक नको, गोवा, रत्नागिरीप्रमाणे येथेही सुविधा निर्माण करा. गणेशोत्सवापूर्वी सर्व स्थानकांची स्वच्छता आणि पाणी सुविधा निर्माण करा. सिंधुदुर्ग स्थानकावर तिकीट आरक्षण सुविधा सुरू करा, अशा सूचना आजच्या बैठकीत रेल्वे अधिकाऱ्यांना दिल्या.
कोकण रेल्वे संघर्ष व समन्वय समितीच्या आपल्या विविध मागण्यांसाठी एक ऑगस्टला सिंधुदुर्ग रेल्वे स्थानकावर आंदोलन करण्याचा इशारा दिला होता. या पार्श्वभूमीवर आज जिल्हाधिकारी पाटील यांनी संघटनेचे पदाधिकारी व रेल्वेचे वरिष्ठ अधिकारी यांची एकत्रित बैठक घेऊन त्यांच्या समस्या जाणून घेतल्या. यावेळी निवासी उपजिल्हाधिकारी मच्छिंद्र सुकटे, रेल्वे प्रशासनाचे अधिकारी मधुकर मातोंडकर, शैलेश बापट, सचिन देसाई, शैलेश आंबाडेकर, रेल्वे प्रवासी समन्वय संघटनेचे अध्यक्ष प्रकाश पावसकर, सचिव अजय मयेकर, उपाध्यक्ष परशुराम परब, शुभम परब, स्वप्निल गावडे, अॅड. नंदन वेंगुर्लेकर आदींसह पदाधिकारी उपस्थित होते.
रेल्वे प्रवासी संघटनेच्यावतीने संघटनेचे अध्यक्ष पावसकर, अॅड. वेंगुर्लेकर यांनी जिल्ह्यातील रेल्वे स्थानकावर असलेल्या समस्या तसेच अपुऱ्या सुविधांबाबत जिल्हाधिकारी यांचे लक्ष वेधले. रेल्वे प्रशासनाकडे गेली दोन वर्ष पत्रव्यवहार तसेच प्रत्यक्ष भेटी देऊनही त्यामध्ये कोणतीही सुधारणा झालेली नाही याबाबत तीव्र नाराजी व्यक्त केली. याबाबत गंभीर दखल घेत जिल्हाधिकारी पाटील यांनी रेल्वे प्रशासनाच्या अधिकाऱ्यांना याचा जाब विचारला. ज्या सुविधा आणि समस्या आपल्या अधिकारात सुटण्यासारख्या आहेत त्या अद्याप का सोडवल्या जात नाहीत? लांब पल्ल्याच्या गाड्या सिंधुदुर्गातील प्रमुख स्थानकावर थांबविला जात नाहीत याबाबत प्रवाशांमध्ये संताप आहे म्हणूनच संघटनेच्या माध्यमातून आंदोलनाचा इशारा दिला आहे. रत्नागिरी व गोव्यामध्ये ज्याप्रमाणे सुविधा आहेत त्याचप्रमाणे येथेही आवश्यक सुविधा निर्माण करा. या जिल्ह्याला वेगळी वागणूक नको. गणेशोत्सवापूर्वी सर्व स्थानकांतील समस्या दूर करा, अशा सूचना यावेळी उपस्थित रेल्वे अधिकाऱ्याना केल्या. यावेळी रेल्वे प्रवासी समन्वय समितिच्या पदाधिकाऱ्यांनी विविध समस्यांकडे लक्ष वेधताना जिल्हा मुख्यालयाचे प्रमुख रेल्वे स्थानक असलेल्या सिंधुदुर्ग स्थानकावर सर्व रेल्वे गाड्यांना थांबा मिळावा. तसेच २० ऑगस्ट ते १० सप्टेंबर या गणेशोत्सव कालावधीत मडूरे ते दादर व सावंतवाडी ते दादर अशा दोन नवीन गाड्या तात्काळ सुरू कराव्यात, सिंधुदुर्ग रेल्वे स्थानकासह वैभववाडी, नांदगाव येथे तिकीट आरक्षण सुविधा सुरु करा. सिंधुदुर्ग जिल्ह्यातील खारेपाटण, वैभववाडी, आचिर्णे, नांदगाव, कणकवली, सिंधुदुर्ग, कुडाळ, झाराप, सावंतवाडी, मडुरा या सर्व दहा रेल्वे स्थानकांवरील प्रवाशांसाठी चांगल्या सोयी सुविधा निर्माण करा. जिल्ह्यामध्ये न थांबणाऱ्या सर्व जलद गाड्यांना सिंधुदुर्ग स्थानकांसह विविध रेल्वे स्थानकावर कायमस्वरूपी थांबा मिळावा. प्लॅटफॉर्म सुविधा नसलेल्या सर्व रेल्वे स्थानकावर प्लॅटफॉर्म सुविधा निर्माण करावी, याकडे लक्ष वेधले. कोकण रेल्वे मार्गावरुन धावणाऱ्या सर्व गाड्या आणि त्यांना कुठे थांबा आहे याची माहिती द्यावी, अशी मागणी केली.
-------------
सिंधुदुर्ग स्थानकाची पाहणी
दरम्यान, जिल्हाधिकारी कार्यालयात झालेल्या बैठकीनंतर रेल्वेचे अधिकारी, संघटनेचे पदाधिकारी, जिल्हा प्रशासनाचे अधिकारी यांनी सिंधुदुर्ग रेल्वेस्थानकाची पाहणी करून तेथील समस्या जाणून घेतल्या. यावेळी स्थानकाची स्वच्छता व पाण्याची सुविधा यांसह आवश्यक सुविधा येत्या चार दिवसात न झाल्यास जिल्ह्यातील सर्व स्थानकावर भिक मागो आंदोलन केले जाईल, असा इशारा संघटनेचे अध्यक्ष पावसकरांसह पदाधिकाऱ्यांनी दिला.