गणेशोत्सवात विशेष गाड्यांची संख्या वाढवा ः नारायण राणे

79511

गणेशोत्सवात विशेष गाड्यांची
संख्या वाढवा ः नारायण राणे

रेल्वेमंत्री वैष्णव यांच्यासोबत चर्चा

सकाळ वृत्तसेवा
कणकवली, ता. २३ ः गणेशोत्सवात कोकणात मोठ्या संख्येने येणाऱ्या चाकरमान्यांसाठी कोकण रेल्वे मार्गावर विशेष गाड्या सोडाव्यात आणि तिकीट आरक्षण लवकर सुरू करावे, अशी मागणी खासदार नारायण राणे यांनी केली आहे. श्री. राणे यांनी दिल्लीत रेल्वेमंत्री अश्विनी वैष्णव यांची भेट घेऊन या विषयावर चर्चा केली. यावेळी त्यांनी लेखी निवेदनही दिले.
निवेदनात त्यांनी म्हटले आहे की, मुंबई, पुणे आणि इतर शहरी भागांत राहणारे कोकणवासीय गणेशोत्सवासाठी आपल्या मूळगावी मोठ्या प्रमाणावर प्रवास करतात. त्यामुळे गणेशोत्सव २०२५ दरम्यान कोकण रेल्वे मार्गावर जादा विशेष गाड्या चालवाव्यात. यंदा गणेश चतुर्थी २७ ऑगस्टला असून विसर्जन ६ सप्टेंबरला आहे. या काळात कोकणात प्रवास करणाऱ्या प्रवाशांची संख्या लक्षणीय वाढते. त्यामुळे आरक्षण मिळणे कठीण होते आणि अनेक प्रवाशांना अडचणींना सामोरे जावे लागते. गतवर्षी भारतीय रेल्वेने कोकण रेल्‍वे मार्गावर तब्‍बल ३४२ विशेष गाड्या सोडल्या होत्या. यंदाही त्याच धर्तीवर अधिक गाड्या चालवाव्यात, अशी मागणी त्यांनी केली.
मुंबईसह पुणे येथील स्थानकावरूनही चिपळूण, संगमेश्वर, रत्नागिरी, राजापूर, वैभववाडी, कणकवली, सिंधुदुर्ग, कुडाळ, सावंतवाडी आदी कोकणातील प्रमुख स्थानकांपर्यंत जादा गाड्यांची संख्या वाढवण्याची गरज त्यांनी व्यक्त केली. या गाड्यांच्या वेळा वेळेवर जाहीर करून आरक्षण लवकर सुरू करावे, जेणेकरून प्रवाशांना प्रवासाची तयारी वेळेत करता येईल. तसेच विद्यमान गाड्यांमध्ये स्लीपर व जनरल डब्यांची भर घालण्याचा विचार व्हावा, अशी सूचना राणे यांनी केली.