सिंधुदुर्गात गुणवंत खेळाडू घडवा

79588

सिंधुदुर्गात गुणवंत खेळाडू घडवा
नीलिमा अडसूळः कासार्डेत शालेय क्रीडा स्पर्धांबाबत सभा
सकाळ वृत्तसेवा
तळेरे, ता. २४ : खेळ आणि खेळाडूंना पूरक ठरणारी शासकीय योजनांची माहिती क्रीडा शिक्षकांनी शाळा आणि संस्थेपर्यंत पोहोचवावी. विद्यार्थी हा केंद्रबिंदू ठेवून क्रीडा शिक्षकांनी खेळात नावलौकिक करणारे खेळाडू घडवावेत, असे आवाहन सिंधुदुर्ग जिल्हा क्रीडा अधिकारी नीलिमा अडसूळ यांनी कासार्डे येथे केले.
जिल्हा क्रीडा परिषद व जिल्हा क्रीडा अधिकारी कार्यालय सिंधुदुर्ग आयोजित शालेय क्रीडा स्पर्धा कणकवली, देवगड आणि वैभववाडी तालुका सभेचे आयोजन माध्यमिक व उच्च माध्यमिक विद्यालय कासार्डे येथे करण्यात आले. याप्रसंगी अध्यक्षीय भाषणात त्यांनी क्रीडा शिक्षकांना मार्गदर्शन केले.
व्यासपीठावर कणकवली तालुका क्रीडाधिकारी राहुल गायकवाड वैभववाडी, देवगड तालुका क्रीडा अधिकारी सचिन रणदिवे, क्रीडा अधिकारी शितल शिंदे, स्थानिक व्यवस्था समितीचे कार्याध्यक्ष संजय पाताडे, शारीरिक शिक्षण व क्रीडा शिक्षक महासंघ सिंधुदुर्गचे जिल्हाध्यक्ष बयाजी बुराण, विद्यालयाच्या प्राचार्या बी. बी. बिसुरे, पर्यवेक्षक एस. व्ही. राणे, क्रीडा मार्गदर्शक माधुरी घराळ, विस्ताराधिकारी (कणकवली) कैलास राऊत, देवगड तालुका विस्ताराधिकारी श्री. दहिफळे, कणकवली तालुका समन्वयक दत्तात्रय मारकड, देवगड तालुका समन्वयक उत्तरेश्वर लाड, वैभववाडी तालुका समन्वयक रामचंद्र घावरे, मुख्याध्यापक प्रतिनिधी बाळासाहेब ढेरे आदी उपस्थित होते.
मुख्याध्यापिका बिसुरे यांनी सर्व मान्यवरांचे तसेच तीन तालुक्यांतून आलेल्या क्रीडा शिक्षकांचे स्वागत केले. प्रमुख अतिथी संजय पाताडे यांनी कार्यक्रमाला शुभेच्छा दिल्या. बयाजी बुराण यांनी मनोगत व्यक्त केले. यावेळी कासार्डेचे क्रीडाशिक्षक दत्तात्रय मारकड यांची कणकवली तालुका समन्वयकपदी निवड करण्यात आली. जिल्हा क्रीडाधिकारी अडसूळ यांनी त्यांना नियुक्ती पत्र देऊन शुभेच्छा दिल्या. सभेचे सूत्रसंचालन कासार्डे ज्युनियर कॉलेजचे प्रा. रामचंद्र राऊळ यांनी केले. आभार कणकवली तालुका समन्वयक दत्तात्रय मारकड यांनी मानले.