माड्याचीवाडी येथील मठात श्रावणमासानिमित्त जप सेवा

माड्याचीवाडी येथील मठात जप सेवा
सकाळ वृत्तसेवा
कुडाळ, ता. २४ ः श्रावणमासानिमित्त श्री स्वामी समर्थ मठ माड्याचीवाडी येथे जप सेवेचे आयोजन दररोज सकाळी १० ते सायंकाळी ५ या वेळेत केले आहे.
भारत देशाला सण, समारंभ आणि उत्सवांचा देश म्हणून ओळखतात. प्रत्येक ऋतूप्रमाणे सण आणि उत्सवाचे आयोजन केले जाते. यात सर्वात मोठा उत्सवाचा काळ श्रावण महिन्याचा असतो. हा महिना सात्विक, भक्तिभावाने पुनीत असा मानला जातो. या महिन्यात अनेक व्रत वैकल्ये केली जातात. या पवित्र श्रावणमासाचे औचित्य साधून श्री श्री १०८ महंत मठाधीश सद्गुरू श्री गावडे काका महाराज यांच्या संकल्पनेतून अवघ्या ८५ दिवसांत साकारलेल्या तालुक्यातील माड्याचीवाडी येथील ऐतिहासिक श्री स्वामी मठात जप सेवा आयोजित केली आहे.  सद्गुरूंच्या संकल्पनेनुसार सर्व भक्तगणांना सुख-समृध्दी व निरोगी आरोग्य लाभावे, त्यांच्या मनोकामना परिपूर्ण व्हाव्यात, यासाठी ''श्री स्वामी समर्थ'' हा एक कोटी जप करण्याचा संकल्प आहे. या जपसेवेत स्वामींचे हजारो भक्तगण सहभागी होणार आहेत. तसेच भजन व विविध धार्मिक कार्यक्रमही आयोजित करण्यात आले आहेत. या जप सेवेत भक्तगणांनी सहभागी होण्याचे आवाहन श्री सद्गुरू भक्त सेवा न्यास या संस्थेचे अध्यक्ष एकनाथ गावडे यांनी केले आहे.