वेताळबांबर्डे निवासी वसतिगृहास माजी सैनिकांतर्फे वॉशिंग मशीन

79594

वेताळबांबर्डे निवासी वसतिगृहास
माजी सैनिकांतर्फे वॉशिंग मशीन
सकाळ वृत्तसेवा
कुडाळ, ता. २५ः सिंधुदुर्ग जिल्हा माजी सैनिक संघ, शाखा कुडाळ यांच्या वतीने वेताळबांबर्डे येथील शोषित मुक्ती अभियान संस्था व ‘नाग्या म्हादू’ निवासी वसतिगृहास वॉशिंग मशीन भेट देण्यात आली. या वसतिगृहामध्ये सिंधुदुर्ग जिल्ह्यातील ८६ मुले व मुली वास्तव्यास आहेत. या वसतिगृहास कुडाळ शाखा माजी सैनिक संघटनेने १५ दिवसांपूर्वी भेट दिली होती.
यावेळी वसतिगृहामधील समस्यांबाबत माहिती घेतली. त्यांनी मुलांचे कपडे धुणे व सध्या पावसाळ्यामध्ये वाळविणे ही समस्या असल्याचे सांगितले. यावर माजी सैनिक संघटनेने सामाजिक बांधिलकी जपत वसतिगृहास आज वॉशिंग मशीन भेट दिली. यावेळी मुलांनी देशभक्ती गीत सादर केले. पी. टी. परब यांनी मुलांना शैक्षणिक, सामाजिक, देशप्रेम याबद्दल माहिती दिली. अखिल भारतीय अंधश्रद्धा निर्मूलन समिती, सिंधुदुर्गच्या वतीने जिल्हा संघटक विजय चौकेकर यांनी मोलाचे मार्गदर्शन केले. या कार्यक्रमात मुलांना खाऊ वाटप करण्यात आले. कार्यक्रमास संघटना अध्यक्ष श्यामसुंदर सावंत, सदस्य बाळकृष्ण चव्हाण, पी. टी. परब, मारुती गावडे, तानाजी बागवे, भास्कर नाटळकर आदी उपस्थित होते.