उदय सामंत प्रतिष्ठानतर्फे मंगळागौर स्पर्धेचे आयोजन

सामंत प्रतिष्ठानतर्फे मंगळागौर स्पर्धा
नोंदणीला सुरुवात ; महिलांना व्यासपीठ
सकाळ वृत्तसेवा
रत्नागिरी, ता. २४ : यंदा सलग तिसऱ्या वर्षी उदय सामंत प्रतिष्ठानतर्फे मंगळागौर स्पर्धेचे आयोजन करण्यात आले आहे. उदय सामंत साहेबांच्या संकल्पनेतून सुरू झालेली मंगळागौर स्पर्धा प्रतिवर्षी श्रावण महिन्यात साजरी केली जात असून, या माध्यमातून महिलांना एकत्र येण्याची संधी मिळते.
गेले २ वर्ष सातत्याने उदय सामंत प्रतिष्ठानतर्फे मंगळागौर स्पर्धेचे आयोजन करण्यात येत होते. या स्पर्धांमध्ये रत्नागिरी तालुक्यातील ग्रामीण व शहरी भागांतून महिलांच्या २७५ ते २८० संघांनी सहभाग घेतला होता. या निमित्ताने महिलांना व्यासपीठ मिळत आहे आणि पारंपरिक खेळ नवीन पिढीला पाहायला मिळत आहेत. यंदा या स्पर्धेचे हे ३रे वर्षे असून, स्पर्धेचे वेळापत्रक जाहीर झाले असून ग्रामीण भागातील महिलांनी स्पर्धक संघांना नोंदणी करण्यास सुरुवात केली आहे. यंदाच्या आयोजनामध्ये स्पर्धेच्या ठिकाणी सामाजिक संदेश देण्याचा प्रयत्न स्पर्धेच्या ठिकाणी पोलिस विभागामार्फत मोबाइलच्या अतिवापराचे दुष्परिणाम, सायबर गुन्हे कसे टाळावेत, अमली पदार्थाचे दुष्परिणाम, महिलांची सुरक्षितता या विषयांचे मार्गदर्शन करण्यात येणार आहे. या कार्यक्रमाच्या ठिकाणी सहभागी महिलांचा रक्तगट व हिमोग्लोबिन तपासले जाणार आहे. त्याचे कार्ड प्रत्येक महिलेला देण्यात येणार असल्याचे आयोजकांनी सांगितले.
----
चौकट
महाअंतिम फेरी १४ ऑगस्टला
यंदा प्रत्येक जिल्हा परिषद गटातून आणि शहरी भागातून विजयी झालेल्या पहिल्या संघाला महाअंतिम स्पर्धेत समाविष्ट करून घेतले जाणार आहे. ही फेरी १४ ऑगस्टला रत्नागिरीतील सावरकर नाट्यगृहात होईल.