रोहयोतून २०० हेक्टर क्षेत्रावर फळबाग लागवड

‘रोहयो’तून २०० हेक्टरवर फळबाग
चिपळूण तालुक्यात नियोजन; भातशेतीत घट
सकाळ वृत्तसेवा
चिपळूण, ता. २४ : तालुक्यात फळबाग उत्पादनावर भर दिला जात आहे. रोहयोच्या माध्यमातून यंदा २०० हेक्टर क्षेत्रावर विविध फळबाग लागवडीचे नियोजन करण्यात आले आहे. यामुळे शेतकऱ्यांना उत्पन्नवाढीसोबतच पडीक शेती लागवडीखाली येणार असून, वेगवेगळे प्रयोग करण्यास प्रोत्साहन मिळणार आहे.
काही वर्षांपासून तालुक्यातील भातशेतीचे क्षेत्र कमी होत आहे. वातावरणातील बदल, पावसाची अनियमितता, महागाईमुळे अनेकांनी शेतीकडे पाठ फिरवली आहे. यामुळेच शेतकऱ्यांना प्रोत्साहन देऊन त्यांच्या उत्पन्नात वाढ होण्यासाठी फळबाग लागवडीला प्रोत्साहन दिले जात आहे. कृषी साहाय्यकांच्या माध्यमातून शेतकऱ्यांमध्ये शासनाच्या विविध फळबाग लागवडीची माहिती दिली जात आहे. शासनाकडून फळबाग लागवडीसाठी अनुदान दिले जाते, ज्यामध्ये पहिल्या वर्षी ५० टक्के, दुसऱ्या व तिसऱ्या वर्षी अनुक्रमे ३० व २० टक्‍के अनुदान दिले जाते. योजनेत अल्पभूधारक आणि अनुसूचित जाती-जमाती प्रवर्गातील शेतकऱ्यांना प्राधान्य दिले जाते.

कोट
रोहयोच्या माध्यमातून यंदा २०० हेक्टर क्षेत्रावर फळबाग लागवड करण्यासाठी तांत्रिक मान्यता मिळाली आहे. आमचे कृषिसेवक गावोगावी जाऊन शेतकऱ्यांना फळबाग लागवडीच्या योजनेची माहिती देत आहेत. शेती सोडणाऱ्या शेतकऱ्यांसमोर भविष्यात आर्थिक संकट येऊ नये म्हणून त्यांना फळबाग लागवडीकडे वळवण्यासाठी आम्ही प्रयत्न करत आहोत.
- शत्रुघ्न म्हेत्रे, तालुका कृषी अधिकारी, चिपळूण