मोकाट गुरांबाबत कायमस्वरुपी उपाय योजा

79634

मोकाट गुरांबाबत कायमस्वरुपी उपाय योजा
देवगडात प्रश्न गंभीर ः अस्वच्छतेसह अपघातांची भिती
सकाळ वृत्तसेवा
देवगड, ता. २४ ः येथील देवगड जामसंडे शहरातील मोकाट गुरांचा प्रश्‍न सातत्याने चर्चेत असतो. मोकाट गुरांमुळे वाहन चालकांसह नागरिकांना मोठी अडचण सोसावी लागते. विशेषतः रात्रीच्यावेळी गुरे रस्त्यावर फिरत असल्याने अपघाताला आमंत्रंण मिळण्याची शक्यता नाकारता येत नाही. सोशल मिडियावरही याबाबत प्रतिक्रिया उमटत असतात. मोकाट गुरांचा तातडीने बंदोबस्त करण्याची मागणी होत आहे.
येथील देवगड जामसंडे शहरातील मोकाट गुरांची समस्या सातत्याने भेडसावत असते. दिवसा तसेच रात्रीही मुख्य रस्त्यासह अंतर्गत मार्गावरही मोकाट गुरे फिरताना दिसतात. काहीवेळा रस्त्यावर एकाचवेळी अनेक गुरे फिरत असल्याने वाहन चालकांना वाहने हाकताना मोठी कसरत करावी लागते. रात्रीच्यावेळी दुचाकीस्वारांना काहीवेळा याचा अंदाज येत नसल्याने मोठी अडचण भासते. काहीवेळा गुरे रस्त्यावर ठाण मांडून बसलेली असतात. अशावेळी वाहनांना बाजू घेऊन वाहने पुढे हाकावी लागतात. त्यामुळे वाहन चालकांमधून नाराजी असते. रस्त्यावरून चालताना महिला तसेच लहान मुलांना याचा त्रास सहन करावा लागतो. त्यामुळे मोकाट गुरांचा बंदोबस्त करण्याची अनेकदा मागणी झाली. याबाबत सोशल मिडियावरही प्रतिक्रिया उमटत असतात. पावसाळ्यात रात्रीच्यावेळी दुकानासमोर गुरे थांबून घाण करतात. त्यामुळे व्यावसायिकांना रोज रात्री दुकान बंद केल्यावर त्याबाबतचा बंदोबस्त करावा लागतो. त्यामुळे व्यापारीही त्रस्त असतात. येथील बसस्थानक आवारातही गुरांमुळे परिसर अस्वच्छ असतो. याचा प्रवाशांनाही त्रास सहन करावा लागतो. त्यामुळे याबाबत कायमस्वरूपी उपाययोजना होण्याची गरज नागरिकांमधून व्यक्त होत असते.