कुणबी संघातर्फे गुणवंतांचा सत्कार

कुणबी संघातर्फे
गुणवंतांचा गौरव
रत्नागिरी ः कुणबी समाजोन्नती संघ, लोकनेते शामराव पेजे ट्रस्ट व कुणबी समाज क्रांती संस्था यांच्या संयुक्त विद्यमाने रत्नागिरी तालुक्यातील कुणबी विद्यार्थी गुणवंत गौरव सोहळ्याचे आयोजन ३ ऑगस्टला सकाळी १० वाजता माध्यमिक शिक्षक पतपेढीत करण्यात आले आहे. या कार्यक्रमासाठी दहावीत ८० टक्केपेक्षा अधिक गुण तसेच कला-वाणिज्य शाखेत ७० टक्केहून अधिक गुण, विज्ञान ६० टक्केपेक्षा अधिक गुण, नवोदय, शिष्यवृत्ती, एनएमएमएस, सीईटी आदी परीक्षांमध्ये यश मिळवणाऱ्या विद्यार्थ्यांनी गजानन धनावडे, संतोष रावणंग, दिगंबर घवाळी, राजीव दरडी यांच्याशी संपर्क करावा. कार्यक्रमाला उपस्थित राहावे, असे आवाहन कुणबी समाजाच्यावतीने सुजित झिमण, रामभाऊ गराटे, संतोष रावणंग, सलील डाफळे यांनी केले आहे.

लांजात ५० जणांनी
केले रक्तदान
लांजा ः मुख्यमंत्री देवेंद्र फडणवीस यांच्या वाढदिवसानिमित्त लांजा तालुका भाजपने आयोजित रक्तदान शिबिरात ५०हून अधिक जणांनी रक्तदान केले. या वेळी सर्व रक्तदात्यांचा प्रशस्तिपत्रक देऊन सन्मान करण्यात आला. मुख्यमंत्री फडणवीस यांच्या वाढदिवसानिमित्त भाजपतर्फे संपूर्ण राज्यभरात महारक्तदान शिबिराचे आयोजन केले होते. कार्यक्रमाला भाजप जिल्हाध्यक्ष राजेश सावंत, महिला मोर्चा सचिव शिल्पा मराठे, तालुकाध्यक्ष शैलेश खामकर, विराज हरमले, माजी तालुकाध्यक्ष चंद्रकांत मांडवकर आदी उपस्थित होते.

दाभोळमध्ये उद्या
आरोग्य तपासणी
दापोली ः दाभोळ येथे २६ जुलैला मोफत आरोग्य तपासणी आणि शस्त्रक्रिया शिबिर आयोजित करण्यात आले आहे. यासाठी डेरवण येथील वैद्यकीय अधिकाऱ्यांचे पथक येणार आहे. यामध्ये मोतिबिंदू, मुतखडा, अॅंजिओप्लास्टी, बायपास, गुडघे बदलणेसारख्या अनेक शस्त्रक्रिया मोफत होण्यासाठी तपासणी आणि नोंदणी होईल त्याशिवाय अन्य शस्त्रक्रिया अल्पदरात करता येतील. याचा अधिकाधिक गरजू रुग्णांनी लाभ घ्यावा, असे आवाहन कोळथरे येथील मिहीर महाजन यांनी केले आहे.