शासकीय कर्मचारी निवास इमारत वापराविना

-rat२४p१८.jpg-
P२५N७९६४७
राजापूर ः डागडुजी आणि रंगरंगोटी केलेली पंचायत समितीच्या आवारातील इमारत.
--------------------
शासकीय कर्मचाऱ्यांची इमारत वापराविना
दुरुस्तीचा लाखोंचा खर्च वाया; कोणाचाही निवास नाही, सुसज्ज असूनही शोभेची बाहुली
सकाळ वृत्तसेवा
राजापूर, ता. २४ ः पंचायत समिती कार्यालयाच्या आवारात गटविकास अधिकारी, बांधकाम उपअभियंता यांच्या निवासस्थानासह कर्मचाऱ्यांना राहण्यासाठी निवासस्थाने अनेक वर्षापूर्वी बांधलेली आहेत. लाखो रुपयांचा खर्च करून या इमारतींची दुरुस्ती आणि रंगरंगोटीही करण्यात आली आहे; मात्र त्या इमारतीमध्ये सद्यःस्थितीत कोणीही निवास करत नाही किंवा त्या इमारतींचा प्रशासकीय कामासाठी उपयोग होत नाही. ही इमारत केवळ शोभेची बाहुली ठरत आहे.
तालुक्याच्या ग्रामीण भागाचा कारभार पंचायत समितीमधून चालवला जातो. त्या समितीची सद्यःस्थितीमध्ये प्रशासकीय इमारत असली तरी सर्व प्रशासकीय दालने एकाच ठिकाणी आणण्यासाठी प्रशस्त आणि सुसज्ज इमारतीची गेल्या कित्येक वर्षापासून पंचायत समितीला प्रतीक्षा आहे. पंचायत समितीच्या प्रशासकीय इमारतीच्या आवारामध्ये गटविकास अधिकारी आणि जिल्हा परिषद बांधकाम विभागाच्या उपअभियंता यांच्या निवासासाठी इमारत बांधण्यात आली आहे. त्याच्या बाजूला कर्मचारी निवासस्थाने असे मिळून या ठिकाणी आठ इमारती आहेत. त्यापैकी तीन इमारती नादुरुस्त असून, उर्वरित इमारतींची डागडुजी आणि रंगरंगोटी केल्याची माहिती जिल्हा परिषद बांधकाम विभागाकडून देण्यात आली. किरकोळ कामे वगळता या इमारती राहण्यासाठी सुसज्ज असल्याचेही बांधकाम विभागाकडून या वेळी स्पष्ट करण्यात आले. या इमारतींच्या दुरुस्तीसाठी जिल्हा परिषद आणि पंचायत समिती सेसमधून निधी खर्च करण्यात आला. सुसज्ज इमारतींमध्ये गटविकास अधिकारी निवास करणे अपेक्षित असताना सद्यःस्थितीमध्ये या इमारतीमध्ये कोणीही राहत नाही वा तिचा अन्य प्रशासकीय कामासाठी उपयोग होताना दिसत नाही. दुरुस्तीनंतर निवासस्थानांचा निवासासाठी उपयोग केला जात नसेल तर त्याच्या दुरुस्तीसाठी लाखो रुपयांचा निधी खर्च कशासाठी करण्यात आला? असा सवाल आता सर्वसामान्यांमधून उपस्थित केला जात आहे.

चौकट
कागदपत्रांमुळे कामकाजात अडथळे
पंचायत समितीच्या मार्गदर्शनाखाली ग्रामपंचायतींच्या माध्यमातून गावोगावी स्वच्छता अभियानाचा जागर घातला जात असताना पंचायत समितीच्या इमारतीमध्ये मात्र विविध विभागांची वर्षानुवर्षाची रेकॉर्डिंग (कागदपत्रे) जागेअभावी कार्यालयामध्येच एकत्रित बांधून ठेवलेले दिसते. ज्यामुळे कार्यालयातील कामकाजात अडचणी येत आहेत.
-------
कोट
राजापूर पंचायत समिती आवारामध्ये गटविकास अधिकारी निवासस्थानासह कर्मचारी निवासस्थाने आहेत. या काही इमारतींची दुरुस्ती करण्यात आली असून, काही कर्मचारी निवासस्थाने अद्यापही नादुरुस्त आहेत. दुरुस्ती झालेल्या गटविकास अधिकारी निवासस्थानासह अन्य इमारतींमधील काही किरकोळ कामे वगळता या इमारती सुस्थितीत आहेत.

- भालेकर, जिल्हा परिषद बांधकाम विभाग