संक्षिप्त-शेतकऱ्यांसाठी अभ्यास दौऱा

शेतकऱ्यांसाठी
अभ्यास दौरा
सिंधुदुर्गनगरी, ता. २४ ः राज्यातील शेतकऱ्यांना आधुनिक तंत्रज्ञान आणि सुधारित शेती पद्धतींचा प्रत्यक्ष अनुभव मिळावा, यासाठी परदेश अभ्यास दौऱ्याचे आयोजन करण्यात आले आहे. या दौऱ्यात भाग घेण्यासाठी सिंधुदुर्ग जिल्ह्यातून ५ शेतकऱ्यांची निवड केली जाणार आहे. इच्छुक शेतकऱ्यांनी ३० जुलैपर्यंत संबंधित कृषी अधिकारी कार्यालयात अर्ज सादर करण्याचे आवाहन जिल्हा अधीक्षक कृषी अधिकारी भाग्यश्री नाईकनवरे यांनी केले आहे. यामध्ये महिला शेतकरी १, केंद्र राज्य कृषी पुरस्कारप्राप्त पीक स्पर्धा विजेते शेतकरी १ व इतर शेतकरी ३ अशा एकूण ५ शेतकऱ्यांचा समावेश असणार आहे. दौऱ्यासाठी अर्ज करताना उमेदवाराचे वय किमान २५ वर्षे असावे, तसेच स्वत: जमीनधारक असावा. उत्पन्नाचे प्रमुख साधन शेती असावे. यापूर्वी शासनाच्या मदतीने दौरा केलेला नसावा. अर्ज व अधिक माहितीसाठी तालुका कृषी अधिकारी कार्यालयाशी संपर्क साधावा, असे आवाहन केले आहे.

मुक्त विद्यालय
परीक्षेसाठी आवाहन
सिंधुदुर्गनगरी, ता. २४ ः महाराष्ट्र राज्य मुक्त विद्यालय मंडळामार्फत पाचवी (प्राथमिक स्तर) व आठवी (उच्च प्राथमिक स्तर) परीक्षेसाठी नव्याने प्रविष्ट होणाऱ्या विद्यार्थ्यांसाठी ऑनलाइन पध्दतीने नावनोंदणी अर्ज प्रक्रिया सुरू झाली आहे. अर्ज प्रक्रिया ३१ जुलैपर्यंत उपलब्ध राहणार असल्याची माहिती महाराष्ट्र राज्य मुक्त विद्यालय मंडळाचे सचिव प्रमोद गोफणे यांनी दिली.
विद्यार्थ्यांनी अधिकृत संकेतस्थळावर ऑनलाइन पद्धतीने नावनोंदणी अर्ज भरावेत. अर्ज भरताना आवश्यक सूचना काळजीपूर्वक वाचूनच पुढील प्रक्रिया करावी. विद्यार्थ्यांनी मूळ अर्ज, विहीत शुल्क व मूळ कागदपत्रे अर्जावर नमूद केलेल्या संपर्क केंद्रशाळेमध्ये जमा करण्याची कालमर्यादा ४ ते १५ ऑगस्टपर्यंत राहील. संपर्क केंद्रशाळांनी विद्यार्थ्यांचे अर्ज, विहीत शुल्क, मूळ कागदपत्रे व विद्यार्थ्यांची यादी विभागीय मंडळाकडे जमा करण्याची अंतिम तारीख २३ ऑगस्टपर्यंत आहे.