प्लंबिंग प्रशिक्षणाला महिलांचा उत्स्फूर्त प्रतिसाद

80080

प्लंबिंग प्रशिक्षणाला महिलांचा उत्स्फूर्त प्रतिसाद

खारेपाटणमध्ये आयोजन; शिक्षण प्रसारक मंडळ, ‘ज्ञानदा’चा पुढाकार

तळेरे, ता. २६ ः खारेपाटण पंचक्रोशी शिक्षण प्रसारक मंडळ खारेपाटण व ज्ञानदा इन्स्टिट्यूट ऑफ फ्लो पायपिंग, पुणे यांच्या संयुक्त विद्यमाने शेठ न. म. विद्यालय व जुनिअर कॉलेज खारेपाटण येथे पंचक्रोशीतील महिलांसाठी नुकतेच विशेष प्लंबिंग प्रशिक्षणाचे आयोजन केले होते. याला खारेपाटण पंचक्रोशीमधील महिलांनी उत्स्फूर्त प्रतिसाद दिला. ज्ञानदा शिक्षण संस्था पुणेचे संचालक मिलिंद डांगे व मोबिलायझेशन ऑफिसर सोमनाथ कुलकर्णी यांच्या प्रमुख उपस्थितीत केले होते.
खारेपाटण पंचक्रोशी शिक्षण प्रसारक मंडळ ही संस्था नेहमीच शैक्षणिक क्षेत्रात उल्लेखनीय कामगिरी करत आहे. यातील उल्लेखनीय बाब म्हणजे गुरुपौर्णिमेच्या शुभ मुहूर्तावर ज्ञानदा इन्स्टिट्यूट ऑफ फ्लो पायपिंग पुणे यांच्या सहकार्याने प्लंबिंग कोर्सेसची उपलब्धता पंचक्रोशीतील विद्यार्थ्यांना केली आहे. आज या संस्थेच्या माध्यमातून ग्रामीण भागांतील महिलांसाठी मोफत प्लंबिंग कोर्सची उपलब्धता करून देण्याचा मानस ज्ञानदा इन्स्टिट्यूट पुणे यांच्या माध्यमातून करण्यात येत आहे. प्लंबिंग या कार्यक्षेत्रामध्ये प्रथमच महिलांना प्रशिक्षण देणारी कार्यशाळा ज्ञानदा इन्स्टिट्यूट पुणे यांच्या माध्यमातून खारेपाटण हायस्कूलमध्ये सुरू करण्यात आली. यासंदर्भात मार्गदर्शन वर्गाचे आयोजन खारेपाटण हायस्कूलमध्ये नुकतेच केले होते. यावेळी संस्था ज्ञानदा इन्स्टिट्यूट पुणेचे संचालक मिलिंद डांगे, मोबिलायझेशन ऑफिसर कुलकर्णी, अमित नाईक, खारेपाटण हायस्कूलचे मुख्याध्यापक श्री संजय सानप रोटरी क्लब ऑफ खारेपाटणचे अध्यक्ष दयानंद कोकाटे हे या कार्यक्रमासाठी प्रमुख उपस्थित होते. प्राचार्य सानप यांनी स्वागत केले. या अभिनव उपक्रमाबद्दल खारेपाटण पंचक्रोशी शिक्षण प्रसारक मंडळ, खारेपाटणचे अध्यक्ष प्रवीण लोकरे, उपाध्यक्ष रघुनाथ राणे, सचिव महेश कोळसुलकर आदींनी आभार मानले.