मारळ शाळेत रानमहोत्सव

मारळ शाळेत
रानभाज्या महोत्सव
साडवली ः मुलांना कोकणातील विविध रानभाज्यांची माहिती व्हावी यासाठी शिक्षकांनी मुलांकडून विविध रानभाज्यांपासून विविध पदार्थ बनवून घेतले. या उपक्रमाने मुलांमध्येही याबाबत जागृती झाली. यावेळी केंद्रप्रमुख आणि मुख्याध्यापक नरेश सावंत, ज्येष्ठ शिक्षिका प्राची सावंत, पद्माकर हर्डीकर, संजय पंदेरे, वेदिका कदम यांच्यासह शाळा व्यवस्थापन समिती अध्यक्ष सुनील सरफरे, गावचे मार्गदर्शक शंकर गुरव, आदिम बियाणे संवर्धन प्रकल्प सचिव कुणाल अणेराव, परीक्षक शरयू दळवी, माईणकर आदी उपस्थित होते. या वेळी रानभाज्या पदार्थांच्या स्पर्धा झाल्या. माता व विद्यार्थी असे एकूण २६ स्पर्धक सहभागी झाले. विजेत्या स्पर्धकांना कुणाल अणेराव यांनी बक्षिसे दिली व रानभाज्या बियाण्यांचे वाटप केले. या स्पर्धेत अळू, भारंगी, काठलं, सुरण, कुडा, आकूर, मायाळू, कवला, बांबू कोंब, रोवणं, शेवगा त्याचबरोबर पारंपरिक तृणधान्याचे पदार्थ यांचा समावेश होता.

संगमेश्वर तालुक्याला
मोफत रुग्णवाहिका
साडवली ः जिजाऊ शैक्षणिक व सामाजिक संस्थेच्या माध्यमातून देवरूख येथे उद्या (ता. २७) दुपारी २ वाजता मोफत पोलिस भरती पूर्व प्रशिक्षण केंद्र व स्पर्धा परीक्षा वाचनालयाचे उद्‍घाटन होणार आहे. माटे भोजने सभागृहात हा सोहळा होणार आहे. या सोहळ्याला जिजाऊ संस्थेचे संस्थापक, शिवसेना उपनेते नीलेश सांबरे यांची प्रमुख उपस्थिती लाभणार आहे. या वेळी संगमेश्वर तालुक्यासाठी मोफत रुग्णवाहिका सेवेची घोषणा होणार आहे. या सोहळ्याला उपस्थित राहावे, असे आवाहन प्रकल्प संचालक संदीप पाटील, देवरूख केंद्र निरीक्षक युयुत्सू आर्ते, रेवा कदम, साहिल रेवाळे यांनी केले आहे.