श्रावण सोमवारासाठी कुणकेश्‍वर सज्ज

80309

श्रावण सोमवार उत्सवास
कुणकेश्‍वरचे मंदिर सज्ज

सकाळ वृत्तसेवा
देवगड, ता. २७ ः तालुक्यातील श्री क्षेत्र कुणकेश्वर येथे श्रावणी सोमवार उत्सवानिमित्त उद्यापासून (ता. २८) १८ ऑगस्टपर्यंत चारही श्रावणी सोमवारी येणाऱ्या भाविकांसाठी सुलभ दर्शन व्यवस्थेचे नियोजन करण्यात आले आहे. उद्या (ता. २८) पहाटे ६ पासून मंदिर भाविकांना दर्शनासाठी खुले करण्यात येणार आहे.
श्रावण सोमवारी होणाऱ्या संभाव्य गर्दीच्या पार्श्‍वभूमीवर प्रशासनातर्फे पोलिस बंदोबस्त, तसेच पार्किंग व्यवस्था करण्यात आली आहे. मंदिरात ‘श्रीं’ची प्रथम पूजा झाल्यानंतर सकाळी ६ वाजता दर्शन रांगा सुरू करण्यात येतील. श्रावण सोमवारनिमित्त येथील आगारातर्फे देवगड-कुणकेश्वर मार्गावर विशेष बस सोडण्यात येणार आहे. तसेच रत्नागिरी, सावंतवाडी, कणकवली येथून जादा गाड्यांची व्यवस्था करण्यात आली आहे. प्रत्येक श्रावणी सोमवारी मंदिरामध्ये सकाळी ६ ते रात्री ८ या वेळेत विविध नामांकित भजनी मंडळांचे कार्यक्रम सादर होणार आहेत. येणाऱ्या भाविकांना सोयी-सुविधा व दर्शन व्यवस्था नियोजन ट्रस्टतर्फे करण्यात आले आहे. येणाऱ्या भाविक आणि पर्यटकांनी देवस्थान ट्रस्टसह प्रशासकीय यंत्रणेस सहकार्य करावे, असे आवाहन ट्रस्टचे अध्यक्ष एकनाथ तेली यांनी केले आहे.