हद्दपारीचे उल्लंघन करणारा सावंतवाडी पोलिसांकडून ताब्यात

हद्दपारीचे उल्लंघन करणारा
सावंतवाडी पोलिसांच्या ताब्यात

सकाळ वृत्तसेवा
सावंतवाडी, ता. २७ ः शहरातून एक वर्षासाठी हद्दपार करण्यात आलेल्या गौरेश दिलीप कामत (वय ३१, रा. उभाबाजार, सावंतवाडी) याला हद्दपारीच्या आदेशाचे उल्लंघन केल्याप्रकरणी पुन्हा ताब्यात घेऊन त्याच्या नियोजित वास्तव्याच्या ठिकाणी सोडले.
येथील उपविभागीय दंडाधिकाऱ्यांनी १७ मार्च २०२५ ला गौरेश कामतला एक वर्षासाठी सिंधुदुर्ग, कोल्हापूर आणि रत्नागिरी जिल्ह्यांमधून हद्दपार करण्याचे आदेश दिले होते. या आदेशाची अंमलबजावणी करताना, गौरेशला त्याच्या आई-वडिलांनी पुणे येथील व्यसनमुक्ती केंद्रात दाखल केले होते. मात्र, तो तिथून पळून गेला होता. २६ जुलैच्या रात्री अकराच्या सुमारास तो शहरात असल्याची माहिती पोलिसांना मिळाली होती. त्यानुसार पोलिसांनी तात्काळ कारवाई करत त्याला ताब्यात घेतले. त्याला हद्दपारीच्या आदेशाची प्रत बजावली असून, त्याच्या वडिलांचा जबाबही नोंदवला आहे. पोलिस हवालदार धुरी आणि हवालदार गलोले यांच्या पथकाने सरकारी वाहनाने गौरेशला त्याच्या नियोजित वास्तव्याच्या ठिकाणी सुरक्षितपणे सोडले आहे. हद्दपारीचा मूळ आदेश १७ मार्च २०२५ ला जारी झाला असला तरी, तो आदेश गौरेशला ज्या दिवशी बजावण्यात आला, म्हणजेच २७ जुलैपासून पुढील एक वर्षासाठी लागू असेल. त्यामुळे, यापुढे जर त्याने हद्दपारीच्या आदेशाचे उल्लंघन केले, तर त्याच्यावर कठोर कायदेशीर कारवाई केली जाऊ शकते, अशी माहिती पोलिसांकडून देण्यात आली आहे.