एनआरसी नोंदणीबाबत अल्पसंख्यांक समाजाची दिशाभूल

‘एनआरसी’वरून अल्पसंघ्याकांची दिशाभूल
जाकीर शेकासन ः फसवणूक करण्याचा काहींचा उद्योग
सकाळ वृत्तसेवा
सावर्डे,ता. २८: राष्ट्रीय नागरिक नोंदणी संदर्भात ( एन. आर. सी.) अल्पसंख्याक समाजाची दिशाभूल करून समाजात भीती निर्माण करण्यात येत आहे. सोशल मीडियावरून कागदपत्रांची यादी प्रसिद्ध करून कागद तयार ठेवण्याचे आवाहन करण्यात येत असून ही अल्पसंख्याक समाजाची आर्थिक फसवणूक करण्याचा काहींनी उद्योग सुरू केला आहे. याला समाजाने बळी पडू नये, असे आवाहन राष्ट्रवादी काँग्रेसचे अल्पसंख्याक सेल जिल्हाध्यक्ष जाकीर शेकासन यांनी केले आहे.
महाराष्ट्रात राष्ट्रीय नागरिक नोंदणीचा कोणताही संबंध नसून भारताच्या सीमेवरील राज्यात एनआरसी लागू करण्यात येणार आहे. असे असताना राज्यातील विशेषतः जिल्ह्यातील अल्पसंख्याक समाजाला सोशल मीडियावरून भलीमोठी कागदपत्रांची यादी पाठवून कागदपत्रे जमा करण्याचे आवाहन करण्याचा उद्योग काही तथाकथित पुढऱ्यांनी सुरू केला आहे. यापुढे फक्त जन्म नोंदीचा दाखला हा एकमेव कागद पुरावा म्हणून ग्राह्य धरण्यात येणार आहे. तेव्हा अल्पसंख्याक समाजातील काहींकडे जन्म नोंदीचा दाखला नसेल अशा व्यक्तींनी जन्म नोंदीचा दाखला काढून घ्यावा, असे आवाहन शेकासन यांनी केले आहे.
राज्यात एनआरसी लागू नाही. फक्त जनगणना होणार आहे. ही जनगणना देश स्वतंत्र झाल्यापासून प्रत्येक १० वर्षांनी होते. २०११ मध्ये जनगणना करण्यात आली होती. आता सन २०२६ मध्ये जातीनिहाय्य जनगणना होणार आहे. तेव्हा अल्पसंख्याक समाजाने आपली जात नमूद करावी. अन्य कोणतीही कागदपत्रे लागणार नसल्याने कोणत्याही अपप्रचाराला बळी पडू नये,अशा शेकासन यांनी सूचना केल्या आहेत.