ग्रामस्थांनीच बुजविले रस्त्यावरील खड्डे

80505

ग्रामस्थांनीच बुजविले रस्त्यावरील खड्डे
वेताळबांबर्डे-कदमवाडीत श्रमदानः धोकादायक वळणावरील झाडीही हटविली
सकाळ वृत्तसेवा
कुडाळ, ता. २८ः वेताळबांबर्डे कदमवाडी रस्त्याची दुरवस्था झाली असून, जागोजागी मोठमोठे खड्डे पडले आहेत. याकडे प्रशासनाचे लक्ष वेधूनही दुर्लक्ष केले जात आहे. त्यामुळे वेताळ बांबर्डे कदमवाडी आणि नळ्याचा पाचा येथील ग्रामस्थांनी एकत्र येत आज रस्त्यावरील खड्डे बुजविले.
वेताळ बांबर्डे भोगलेवाडी ते कदमवाडी शाळेपर्यंतच्या रस्त्याची खड्ड्यांमुळे पार चाळण झाली आहे. नक्की रस्त्यात खड्डे आहेत की खड्ड्यांमध्ये रस्ता, हे देखील कळत नाही, एवढी रस्त्याची दुर्दशा झाली आहे. वेताळ बांबर्डे कदमवाडी या भागात मोठी लोकवस्ती आहे. त्यामुळे या रस्त्यावरून नेहमी वाहनांची वर्दळ असते. या भागातून वाहने हाकताना वाहनचालकांना मनस्ताप सहन करावा लागत आहे. याशिवाय या खड्ड्यांमध्ये पावसाचे पाणी साचल्याने खड्ड्यांचा अंदाजही येत नाही. त्यामुळे वाहनांचा अपघात होण्याची शक्यता नाकारता येत नाही.
बऱ्याचदा या खड्ड्यांमधून वाहने हाकताना खड्ड्यातील पाणी पादचाऱ्यांच्या अंगावर उडते. त्यामुळे पादचाऱ्यांमधून देखील नेहमी संताप व्यक्त केला जात होता. धोकादायक वळणावर झाडी वाढल्यामुळे देखील अपघाताची शक्यता होती. या रस्त्याच्या दुरवस्थेमुळे १ ऑगस्टपासून एसटी बसची वाहतूक देखील या मार्गाने बंद होणार होती. याचा वयोवृद्ध व्यक्ती, स्थानिक भाजी विक्रेते यांच्यासह विद्यार्थ्यांना फटका बसणार होता. याबाबत प्रशासनाचे लक्ष वेधूनही प्रशासनाकडून कोणतीही हालचाल करण्यात आली नाही. अखेर संतप्त झालेल्या ग्रामस्थांनी रविवारी (ता. २८) पुढाकार घेत श्रमदानातून रस्त्यावरील खडे बुजविले. तसेच धोकादायक वळणावरील झाडी देखील ग्रास कटरच्या सहाय्याने हटवून रस्ता मोकळा करण्यात आला.