-स्थानिक युवकांना रोजगार द्या

‘लोटे एमआयडीसीत
स्थानिकांना रोजगार द्या’
चिपळूण, ता. २८ ः लोटे-परशुराम औद्योगिक क्षेत्रात औषधनिर्मिती, रसायन व इतर उत्पादन क्षेत्रातील उद्योग कार्यरत आहेत. तिथे स्थानिक युवकांना रोजगार मिळावा आणि उद्योगांना आवश्यक त्या सुविधा मिळाव्यात यासाठी प्रयत्न करण्याचा निर्णय सर्वानुमते घेण्यात आला. लोटे-परशुराम इंडस्ट्रीज असोसिएशनच्यावतीने, उद्योगभवन, लोटे (ता. खेड) येथे एमआयडीसी लोटे-परशुराम क्षेत्रातील कारखानदारांची महत्त्वपूर्ण बैठक झाली. त्या वेळी विविध विषयांवर चर्चा झाली. या बैठकीत औद्योगिक वसाहतीतील सध्याची स्थिती, कारखानदारांना भेडसावणाऱ्या अडचणी, पायाभूत सुविधा, पर्यावरणीय विषय आणि भविष्यातील औद्योगिक वाटचाल यावर सविस्तर चर्चा झाली. विविध उद्योग प्रतिनिधींनी आपले अनुभव, अडचणी आणि सूचना मांडत या क्षेत्रातील समस्यांना प्रकाशात आणले. उपस्थित संबंधित शासकीय अधिकाऱ्यांनी त्यावर सकारात्मक प्रतिसाद देत कार्यवाहीचे आश्वासन दिले. औद्योगिक विकास अधिक गतिमान, समन्वयपूर्ण आणि शाश्वत करण्यासाठी सर्व संबंधित घटकांनी एकत्रितपणे काम करण्याचा निर्धार व्यक्त केला.
या बैठकीला आमदार शेखर निकम, राष्ट्रवादीचे जिल्हाध्यक्ष बाबाजी जाधव, अजय बिरवटकर, साधना बोत्रे, लोटे उद्योजक संघटनेचे अध्यक्ष राज आंब्रे, प्रशांत पटवर्धन आदी उपस्थित होते.

...... खान......