चिपळूण-चिपळुणात प्रभाग रचनेत अंशतः बदलाचे संकेत
80526
चिपळुणात प्रभाग रचनेत
अंशतः बदलाचे संकेत
मध्यवर्ती भागातील रचना कायम ; उपनगरात बदल, इच्छुकांमध्ये चलबिचल
सकाळ वृत्तसेवा
चिपळूण, ता. २८ : चिपळूण नगरपालिकेच्या पंचवार्षिक निवडणुकीसाठी प्रभाग रचना तयार करण्याचे काम सुरू आहे. उपनगरात अंशतः बदल होण्याची शक्यता व्यक्त केली जात आहे. गट न फोडता काही किरकोळ बदलांतर्गत प्रभाग रचनेत अंशतः बदल होणार आहे.
शहरातील मध्यवर्ती भागातील प्रभाग रचना कायम ठेवली आहे. परिणामी, अंशतः बदल झालेल्या प्रभागात इच्छुकांमध्ये मतांच्या गणिताची बेरीज-वजाबाकी आणि जुळवाजुळव सुरू झाली आहे. आगामी स्थानिक स्वराज्य संस्था निवडणुकीच्या निवडणूक नियोजन कार्यक्रमअंतर्गत सुरू झालेल्या विविध नियोजनात चिपळुणातील नगरसेवकांच्या संख्येत वाढ झाली आहे. यापूर्वी १३ प्रभागांमधून २६ नगरसेवकांची जनतेतून निवड करण्यात येत होती. आता १४ प्रभागांतून २८ नगरसेवकांची निवड होणार आहे. म्हणजेच एका प्रभागाची वाढ झाली आहे. साधारणतः दोन वर्षांपूर्वी निवडणुका होणार, या अपेक्षेने त्या वेळी निवडणूक आयोगाकडून निवडणूक नियोजन कार्यक्रमअंतर्गत आरक्षण, प्रभाग रचना व नगरसेवक आरक्षण हा कार्यक्रम राबवला होता. त्यानुसार दोन वर्षांपूर्वी प्रभाग रचना अंतिम केली होती.
तसेच प्रभागातील नगरसेवक आरक्षणेदेखील जाहीर झाली होती; मात्र, सुमारे दोन वर्षांच्या कालावधीत निवडणुका न झाल्याने आता वर्षाअखेर निवडणुका होण्याची अपेक्षा व्यक्त होत आहे. त्या दृष्टीने निवडणूक आयोगाकडून तयारी हाती घेण्यात आली. त्या अंतर्गत सप्टेंबरअखेर दिलेल्या कार्यक्रमातील नियोजन पूर्ण करण्यात येणार आहे. त्यानुसार मुख्याधिकारी विशाल भोसले व मालमत्ता विभागप्रमुख सागर शेडगे यांच्या समितीने संबंधित कार्यक्रमातील नियोजन सुरू केले आहे. या नियोजनअंतर्गत शहरातील काही प्रभागरचनेत अंशतः बदल केल्याचे सांगितले जाते.
प्रामुख्याने हे बदल उपनगर प्रभागात करण्यात आल्याचे समजते. झालेल्या अंशतः बदलांमुळे इच्छुकांमध्ये चलबिचल सुरू झाली आहे. काही इच्छुकांनी मतांच्या बेरजेची गणिते मांडण्यास सुरवात केली आहे. अंशतः बदलात अशी एकगठ्ठा मते आपल्या वाट्याला येणार की, नाहीत याची चिंता इच्छुकांना लागली आहे.
कोट
चिपळूण पालिका निवडणुकीसाठी प्रभाग रचना बनवण्याचे काम सुरू आहे. हे प्रशासकीय काम आहे. त्यात कोणाचा हस्तक्षेप नको म्हणून गोपनीय पद्धतीने कामकाज सुरू आहे. अंतिम यादी तयार झाल्यानंतर वृत्तपत्रात प्रसिद्ध केली जाईल.
- सागर शेडगे, मिळकत कर अधिकारी, चिपळूण पालिका
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.