कुणकेश्वरात भक्तांची मांदियाळी

80533

कुणकेश्वरमध्ये समुद्राची गाज अन् ‘बम बम भोले’चा गजर

पहिला श्रावण सोमवार; दर्शनासाठी भाविकांच्या रांगा, धार्मिक वातावरण

सकाळ वृत्तसेवा
देवगड, ता. २८ : तालुक्यातील श्री क्षेत्र कुणकेश्वर मंदिरात श्रावण सोमवारनिमित्ताने भाविकांनी दर्शनासाठी गर्दी केली होती. भाविक दर्शनासाठी रांगेत होते. दिवसभरात विविध मान्यवरांनी दर्शन घेतले. आज पहिलाच श्रावण सोमवार असल्याने भाविकांची सकाळपासूनच दर्शनासाठी गर्दी झाली होती. दरम्यान, पाऊस नसल्याने सर्वांच्या सोयीचे झाले होते.
श्रावण महिन्यातील पहिलाच सोमवार असल्यामुळे भाविकांची पावले आज श्री क्षेत्र कुणकेश्वरकडे वळली. श्री देव कुणकेश्वर मंदिर देवस्थान ट्रस्टने भाविकांच्या सोयीसाठी दर्शन मंडप तसेच दर्शन रांगांची व्यवस्था केली होती. भाविकांना थेट गाभाऱ्यात जाऊन श्रींचे दर्शन घेता येत होते. देवस्थान ट्रस्टचे अध्यक्ष एकनाथ तेली यांच्यासह अन्य पदाधिकारी तसेच व्यवस्थापक रामदास तेजम भाविकांच्या सेवेसाठी कार्यरत होते. दिवसभरात विविध ठिकाणच्या भाविकांनी दर्शन घेतले. कुणकेश्‍वर मार्गावर वाहनांची वर्दळ सुरू होती. मंदिरात विधिवत पूजा झाल्यावर मंदिर भाविकांना दर्शनासाठी खुले करण्यात आले. आज पाऊस नसल्याने अनेकांना सोयीचे झाले होते. मंदिरात प्रसाद वाटप करण्यात आला. मंदिर आणि परिसरात भाविकांची वर्दळ होती.
---
शिवामूठ घालण्यासाठी धांदल
समुद्राच्या फेसाळणाऱ्या लाटा किनाऱ्यावर धडकतानाचे दृश्य भाविक डोळ्यात साठवीत होते. तालुक्यातील तसेच जिल्हाभरासह लगतच्या जिल्ह्यातील भाविक दर्शनासाठी आल्याचे दिसत होते. एकूणच सर्वत्र उत्साही वातावरण होते. दरम्यान, येथील शहरातील श्री ब्राह्मणदेव मंदिरातही भाविकांची दर्शनासाठी वर्दळ होती. नवविवाहितांची शिवामूठ घालण्यासाठी धांदल होती.